Presidenti i Serbisë, Aleksandar Vuçiç pritet që të shtunën të vizitojë Kosovën, vizitë e cila është lejuar edhe nga institucionet shtetërore të Kosovës, raporton Anadolu Agency (AA).
Pas rastit të vrasjes së liderit serb të Nismës Qytetare SDP, Oliver Ivanoviç, pritet që presidenti serb Vuçiç të shtunën të vizitojë Kosovën, përkatësisht Mitrovicën Veriore edhe Graçanicën. Gjatë vizitës pritet që Vuçiç të bisedojë me qytetarët e këtyre komunave, të cilat në shumicë banohen nga komuniteti serb i Kosovës.
Dhënien e lejes për vizitën e Vuçiçit për AA e ka konfirmuar Jetlir Zyberaj, shef i Kabinetit dhe këshilltari lartë i zv/kryeministrit dhe ministrit të Jashtëm të Kosovës, Behgjet Pacolli.
“Sipas kërkesës që është parashtruar nga Presidenti i Serbisë ndaj institucioneve të Republikës së Kosovës për vizitë në Kosovë, ne i kemi dhënë leje për këtë vizitë dhe presim që ai të sillet mirë dhe të respektojë rregullat e lejes gjatë qëndrimit në Republikën e Kosovës”, ka thënë ai.
Kujtojmë se mëngjesin e ditës së djeshme në rrugën “Sutjeska” në veri të Mitrovicës u vra lideri i nismës qytetare “Liri, Demokraci, Drejtësi”, Oliver Ivanoviç.
