Zbardhen detaje të reja nga vrasja e 17-vjeçares, Griselda Gjikolaj dhe plagosjen e të dashurit të saj Erion Benga, 23-vjeç, pasditen e djeshme në Laprakë. Erion Benga ka qenë në një lokal me të miturën dhe një vajzë tjetër te blloku “Gintash”. Të njëjtat burime saktësojnë se në të njëjtin lokal kanë qenë të pranishëm edhe dy autorët. Këta të fundit dyshohet se kanë ngacmuar vajzat në tavolinën e Bengës çka ka acaruar tonet mes të rinjve të cilët kanë debatuar me njëri-tjetrin.
Erion Benga largohet më pas nga lokali i shoqëruar nga dy vajzat. Menjëherë pas tyre kanë dalë nga lokali edhe dy autorët. Pasi Benga dhe e dashura e tij kishin hipur në makinë, një prej autorëve i cili dyshohet se është me origjinë nga Puka ka hapur zjarr në drejtim të Erion Bengës dhe Griselda Gjikolajt, duke lënë të vdekur këtë të fundit, ndërsa 23-vjeçari mbeti i plagosur.
