Teksa vijon numërimi i votave të Diasporës në Parkun Olimpik, katër qarqe mbeten ende të hapura për ndryshime mandatesh, sipas përllogaritjeve të bëra mbi të dhënat zyrtare të KQZ-së.
Vlora është qarku më i ndjeshëm, ku kanë mbetur për t’u numëruar rreth 10 mijë vota. PD-së i duhen vetëm 154 vota më shumë se PS-së për të rimarrë mandatin e katërt. Por me trendin aktual ku PS ka marrë 60% të votave të diasporës dhe PD vetëm 15%, socialistët pritet ta ruajnë epërsinë.
Në Fier, kandidatit të pavarur Adriatik Lapaj i duhen 550 vota më shumë për t’i marrë mandatin Partisë Socialiste. Janë ende 15,400 vota për t’u numëruar, ndaj ky është një ndër garat më të hapura.
Edhe Tirana mbetet në lojë, ku beteja është mes PD-së dhe partisë “Mundësia” të Agron Shehajt. PD-së i duhen 583 vota shtesë për të rikuperuar mandatin e 14-të.
Ndërsa në Lezhë, kanë mbetur rreth 5 mijë vota për t’u numëruar, por PS-së i duhen plot 1302 vota më shumë se PD-së për të përmbysur rezultatin aktual 4-3 në favor të opozitës – një objektiv më i vështirë për t’u arritur.
Numërimi i votave të diasporës pritet të jetë vendimtar për ndarjen përfundimtare të mandateve në këto qarqe.
Situata në 4 qarqet
Tiranë- PD i merr mandatin partisë mundësia për 583 vota (janë pa numëruar 20 mijë vota të diasporës)
Fier- Lapaj i merr mandatin PS për 550 vota (janë pa numëruar 15400 vota të diasporës)
Lezhë- PS i merr mandatin PD për 1302 vota (janë pa numëruar 5 mijë vota të diasporës)
Vlorë- PD i merr mandatin PS për 154 vota (janë pa numëruar 10 mijë vota të diasporës).
