Ai njihet për sulmet e tij të drejtpërdrejta dhe sa herë i është dhënë mundësia nuk e ka kursyer ironinë në reagimet e tij publike.
Bëhet fjalë për ish-deputetin e PD-së Astrit Patozi, i cili me statusin e tij ka shigjetuar sërish kreun e demokratëve, Lulzim Basha për protestën e 27 janarit.
Kjo për zgjedhjen e sloganit të protestës, ku opozita është frymëzuar nga një këngë e John Lennon. Patozi thekson se kjo është një këngë me himnin e paqes dhe se nuk mund të shkohet me të në ‘luftë’.
MESAZHI I PATOZIT:
TË SHKOSH NË LUFTË ME HIMNIN E PAQES (REHATIT)
I paskam rënë kot më qafë disa të mërziturve publikë me Lulzim Bashën. Sepse deri më sot mendoja se termi “i vonuar”, që ata përdornin për të, ishte pak i rëndë dhe i ekzagjeruar.
Por tani po shoh slloganin e protestës së 27 janarit, i cili qenka frymëzuar nga një këngë e hershme e John Lennon. Atë e paska shpallur Lulzim Basha si një gjetje të veçantë të vetën apo të ndonjë këshilltari jodizastër, pak rëndësi ka.
Kënga i përket vitit 1971, por nuk është mosha e saj që e bën të duket kaq të vonuar Lulin.
As fakti që ajo është një lloj himni Krishtlindjesh dhe u bë një copë kohë që e kemi lënë pas atë festë. Ne këtu ishim gjithësesi, edhe populli i mërzitur nga qeveria, edhe viktimat e narkoshtetit, edhe ata që duan të ikin nga Shqipëria, por nuk kanë mundësi, ndërsa Luli vetë ishte në Holandë. Jo vetëm për Krishtlindje, por edhe për Vitin e Ri. Tamam si në tekstin e këngës së John Lennon, që i drejtohet të dyja festave.
Por një Zot e di se pse i ka ngelur mendja tek ajo këngë e vjetër, që i kushtohet paqes, në kohën që po përgatitet të shkojë në luftë? Sepse nuk besoj që Lulzim Basha ka ndërmend të rrëzojë qeverinë e drogës, duke mbajtur në duar degën e ullirit.
Të jetë bërë Gandhi-st vallë Lulzim Basha, apo është thjesht “i vonuar”, siç thonë prej kohësh disa figura publike?
TË SHKOSH NË LUFTË ME HIMNIN E PAQES (REHATIT)I paskam rënë kot më qafë disa të mërziturve publikë me Lulzim Bashën….
Posted by Astrit Patozi on Tuesday, January 16, 2018
