Policia nisi hetimet për përgjegjësen dhe arkëtaren e zyrës postare në Vishocicë të Devollit, me akuzën se kanë vjedhur pensionet dhe ndihmat ekonomike të qytetarëve në vlerën e rreth 220 mijë eurove.
Përgjegjësja, 29 vjeçe dhe arkëtarja 27 vjeçe akuzohen për “Vjedhje të kryer duke shpërdoruar detyrën”, “Falsifikimi i dokumenteve” dhe “Falsifikimi kompjuterik”.
Në bashkëpunim me njëra-tjetrën, gjatë periudhës shtator 2025 – janar 2026, ato dyshohet se kanë vjedhur rreth 220 mijë euro nga fondi i postës.
Përgjegjësja dyshohet se ka përvetësuar dhe shpërdoruar fondet e pensioneve dhe të ndihmës ekonomike, kryesisht të pensionistëve që jetonin jashtë shtetit, duke falsifikuar nënshkrimet e tyre.
Ndërsa arkëtarja ka manipuluar, hequr dhe falsifikuar mandatpagesat nga evidenca e librave të arkës për të favorizuar vjedhjen e fondeve nga kolegia.
Ato po hetohen në gjendje të lirë, pasi njëra nga punonjëset është shtatzënë dhe tjetra është nënë e një fëmije të vogël.
Përmes një komunikate për shtyp, Posta Shqiptare thekson se fondet e pensioneve nuk janë cenuar dhe shpërndarja e tyre vijon normalisht, pa asnjë ndërprerje, duke garantuar vazhdimësinë e shërbimit për të gjithë përfituesit.
Njoftimi i policisë
Drejtoria Vendore e Policisë Korçë
Specialistët e Seksionit për Hetimin e Krimeve Ekonomike dhe Financiare referuan materialet në Prokurori, ku filloi procedimi penal për veprat penale “Vjedhja e kryer duke shpërdoruar detyrën”, “Falsifikimi i dokumenteve” dhe “Falsifikimi kompjuterik”, kryer në bashkëpunim, për shtetaset:
-P. Sh., 29 vjeçe, banuese në Bilisht, me detyrë përgjegjëse e zyrës postare Vishocicë, Devoll;
-E. Ç., 27 vjeçe, banuese në Bilisht, me detyrë arkëtare-llogaritare, në degën postare Devoll.
Nga hetimet dyshohet se këto shtetase, në bashkëpunim me njëra-tjetrën, gjatë periudhës shtator 2025 – janar 2026, kanë vjedhur rreth 22 000 000 lekë të rinj nga fondi i postës, duke shpërdoruar detyrat. Shtetasja P. Sh. dyshohet se ka përvetësuar dhe shpërdoruar fondet e pensioneve dhe të ndihmës ekonomike (kryesisht të pensionistëve që jetonin jashtë shtetit), duke falsifikuar nënshkrimet e tyre, ndërsa shtetasja E. Ç. dyshohet se ka manipuluar, hequr dhe falsifikuar mandatpagesat nga evidenca e librave të arkës dhe sistemit të menaxhimit të parave cash, për të favorizuar vjedhjen e fondeve nga 29-vjeçarja.
Vijon puna për identifikimin e shtetasve të tjerë të dyshuar që mund të jenë përfshirë në këtë rast.
