Violinisti i njohur shqiptar, Jonian Ilias Kadesha, do të performojë sot në mbrëmje për publikun kryeqytetas.
Me pjesëmarrjen speciale të violinistit Kadesha, dirigjentit Jonathan Bloxham dhe violinçelistes Vashi Hunter, Orkestra Simfonike e Radio Televizionit Shqiptar do të hapë sezonin e ri artistik në sallën koncertale të Katedrales Ortodokse.
Violinisti është pritur fillimisht nga kryetari i Bashkisë së Tiranës, Erion Veliaj, i cili i dhuroi në formë vlerësimi “Kullën e Sahatit të Tiranës”.
“Dua të të jap një dhuratë të vogël si çun Tirone që je, edhe pse ke lindur jashtë, po genin dhe gjakun e ke tirons: Kjo është Kulla e Sahatit të Tiranës. Pavarësisht vendit ku do të jesh duke performuar, ky sahati ynë i vogël tregon gjithmonë orën e Tiranës. Prandaj, sa herë që të kthehesh te tavolina ose bufeja ku do e vendosësh, do kujtohesh sa është ora në Tiranë dhe se sa i mirëpritur je këtu. E jap këtë Kullë në emër të qytetit, si shenjë mirënjohje, admirimi e respekti për ty”, ka thënë Veliaj.
“Jam shumë mirënjohës për këtë dhuratë simbolike, me shumë domethënie. Do ta vendos në vendin më të çmuar që kam në shtëpi, aty ku mbaj violinën. Faleminderit shumë për të gjithë mbështetjen dhe do gëzohesha edhe unë shumë të shoh sa më shumë njerëz nga Tirana për të na mbështetur në një koncert shumë special, hapjen e sezonit të Orkestrës Simfonike të Radio Televizionit Shqiptar. Një orkestër me të cilën jam shumë i lidhur që në moshë të vogël. Babai im ka luajtur në orkestër dhe shumë kolegë të tij, miq të tij të ngushtë, janë bërë edhe miqtë e mi”, i është përgjigjur Kadesha vlerësimit të Veliajt.
Kryebashkiaku është shprehur se Jonian Kadesha përfaqëson më së miri ata djem dhe vajza që ia kanë dalë mbanë falë talentit dhe punës së tyre, ndërsa i ftoi të gjithë qytetarët që t’i bashkohen koncertit sot në orën 19:00.
“Mezi presim kur dëgjojmë se çuna e goca të reja nga Shqipëria kanë ecur përpara. Na bën krenarë edhe për faktin që u tregon djemve dhe vajzave këtu se çdo gjë është e mundur. Kur arrin të bëhesh yll i botës së muzikës në moshën 20 e ca vjeçare vetëm falë punës, inkurajon çuna dhe goca të tjerë në të gjithë Shqipërinë. Presim që të gjithë të jeni te Katedralja Ortodokse, te Qendra e Kulturës, ku Joni dhe dy kolegët e tij kanë një koncert të shkëlqyer, unik në Shqipëri”, ka deklaruar Veliaj.
