Në prag të publikimit të progres-raportit për vendet e Ballkanit, Presidenti i Komisionit Europian, Jean Claude Juncker u shpreh para Parlamentit Europian se argumenti bazë i ekzekutivit europian për nxitjen e perpektivës së zgjerimit është evitimi i rikthimit të luftërave në rajonin e Ballkanit.
Jean Claude Juncker: “Ne kemi vendosur në Selanik në 2003 për t’i dhënë një perspektivë të besueshme europiane vendeve të Ballkanit. I di të gjitha vështirësitë që ekzistojnë rreth kësaj çështjeje. Komisioni do të ketë një debat lidhur me këtë me përfaqësuesen e lartë Federica Mogherini dhe të tjerë. Nuk jam naiv. I njoh vështirësitë dhe përpjekjet që vendet e Ballkanit duhet të bëjnë. E di që ka një nevojë për përmirësimin e disa pikave të performancës së disa shteteve të Ballkanit, por nëse ne jua heqim perspektivën europiane këtyre vendeve në këtë rajon ultra të komplikuar dhe ndoshta duhet të them tragjik, ne rrezikojmë të rijetojmë evenimentet e ’90-s. Nuk dua kthimin e luftës në Ballkan, ndaj ne duhet të përkrahim këtë perspektivë”./abcnews.al
