Prokuroria e Tiranës ka nisur verifikimet për kontratën që Partia Demokratike ka bërë me disa kompani lobimi në SHBA.
Bëhet fjalë për 1 milion dollarë të paguara drejt këtyre firmave të lobimit me bazë në SHBA, me qëllim sigurimin e mbështetjes politike nga Uashingotoni. Kontratat u publikuan fillimisht nga “Birn”, ndërsa Prokuroria ka nisur verifikimet për burimin e parave. Këto para janë marrë nga kompanitë “Stonington Strategies”, “Muzin Capitol Partners” dhe “Biniatta Trade LP”.
Po kështu, dy kontratat me “Stonington Strategies” PD-ja i ka finalizuar pak ditë para zgjedhjeve të 25 qershorit. Lidhur me paratë që janë paguar, Prokuroria kërkon të verifikojë burimin se nga kanë ardhur ato. Kjo për shkak se deri më tani, shuma e shpenzuar prej 1 milion dollarësh nuk është deklaruar në raportin financiar të dorëzuar nga ky subjekt politik në Komisionin Qendror të Zgjedhjeve për 25 qershorin.
Burimet thonë se shuma mund të jetë paguar edhe në rrugë informale nga Partia Demokratike, por kjo mbetet për t’u vërtetuar. Hetimet nga organi i akuzës nisën pas publikimeve të dokumenteve të kontratave që vërtetonin edhe shumat e pagesave nga “Birn”.
Pagesat rezultojnë se janë bërë në kohën kur PD-ja ishte e angazhuar në të ashtuquajturën “Çadra e Lirisë”, dy javë para zgjedhjeve. Lidhur me burimin dhe mënyrën e pagesës së parave, pritet të japë shpjegime në Prokurori departamenti i financës në PD. Paraditen e djeshme u regjistrua procedura e verifikimit nga Prokuroria e Tiranës.
Deri më tani, Prokuroria ka në dorë vetëm dokumentet e publikuara në media, ndërsa gjatë javës që vjen pritet të marrë të tjera nga PD. Sipas “Birn”, pagesat për kompanitë e lobimit janë bërë nëpërmjet dy kontratave të lidhura në fund të marsit përmes kompanisë “Biniatra Trade LP”, e cila figuron të jetë regjistruar në Skoci.
Vlera totale e kontratave ishte 675 mijë dollarë, ndërsa në të përfshihen edhe pagesat mujore.
