Partia Socialiste ka zgjedhur kandidat me të cilin do të garojë në zgjedhjet e pjesshme bashkiake të Himarës me 4 gusht.
Kryesia ka vendosur se do të jetë Vangjel Tavo, ai që do kërkojë votën e himariotëve për të drejtuar këtë bashki. Zgjedhjet do të mbahen në datën 4 gusht, pasi presidenti Bajram Begaj njoftoi se kjo datë është cilësuar alternativa më e mirë që pajton nevojën për përgatitjen dhe zhvillimin e një fushate të rregullt zgjedhore bazuar edhe tek rrethanat dhe ngarkesën që sjell sezoni veror për bashkinë e Himarës.
Aktualisht kjo bashki drejtohet nga kryetari i Komanduar Arqile Bollano, pas dorëheqjes së Blerina Balës në 5 Qershor. Më herët në detyrë ka qenë Jorgo Goro, i cili u arrestua me urdhër të SPAK në 23 Mars. Goro mbajti detyrën pas arrestimit të Fredi Belerit, kandidati i “Bashkë Fitojmë” që fitoi mandatin nga zgjedhjet lokale.
Po ashtu në këtë mbledhje, është vendosur që të shtyhet për në datën 27 korrik Kongresi, i cili ishte parashikuar të mbahej më 20 korrik.
