Edhe pse vlera e bonusit për mjekët dhe pjesën tjetër të personelit shëndetësor që është në vijën e parë të zjarrit, në përballjen me COVID-19, ka mbetur e njëjtë, qeveria ka vendosur të shtojë filtrat.
Një strukturë e posaçme me përfaqësues nga disa institucione do të vlerësojë nivelin e riskut dhe ngarkesën e bluzave të bardha dhe do të hartojë çdo muaj listat e përfituesve që do të vijojnë të marrin krahas pagës edhe shpërblimin.
VENDIMI
Ndryshimet janë bërë në mbledhjen e fundit të qeverisë, ku ka kaluar për miratim edhe vendimi “Për dhënie shpërblimi për personelin mjekë, infermierë dhe punonjës të tjerë”.
Sipas kësaj nisme, lista e përfituesve dhe dokumentacioni justifikues miratohet bazuar në analizën e shkallës së ngarkesës së veprimtarisë dhe të riskut që mbart aktiviteti i strukturës shëndetësore e cila vlerësohet nga sekretariati.
Kjo strukturë e re, e cila do të nis nga puna këtë muaj, do të përbëhet nga 2 përfaqësues të Ministrisë së Shëndetësisë, 1 përfaqësues nga Instituti i Shëndetit Publik, 1 përfaqësues nga Operatori i Shërbimit të Kujdesit Shëndetësor dhe një përfaqësues nga Fondi i Sigurimit të Detyrueshëm të Kujdesit Shëndetësor.
SHPËRBLIMI
Përmes vendimit të miratuar në mars të 2020, personeli mjekësor, specialistët e shëndetit publik që merren me epidemiologjinë, infermierët dhe specialistët e shërbimit laboratorik të angazhuar në diagnostikimin dhe trajtimin mjekësor të personave të prekur me COVID-19 marrin çdo muaj një bonus në vlerën e 125 mijë lekëve.
Prej gati dy vitesh me shpërblim trajtohen edhe personeli mbështetës, i angazhuar në institucionet ku trajtohen pacientët e infektuar, por vlera e çekut për këtë kategori është 65 mijë lekë.
Në 24 orë, 6 humbje jete nga COVID-19
Vijojnë të jenë të larta shifrat e infeksionit në vend. Të mërkurën janë regjistruar 2643 persona të prekur nga 7859 testime të kryera, duke e çuar në rreth 23 mijë numrin e të infektuarve aktivë. Përveç rasteve të reja, janë rritur edhe fatalitetet si pasojë e COVID-19. Në harkun e 24 orëve janë shënuar 6 humbje jete të grupmoshave 66-85 vjeç.
“Aktualisht në spitalet COVID po marrin trajtim 128 pacientë, nga të cilët 14 janë në gjendje më të rënduar. Në 24 orët e fundit me gjithë përpjekjet e stafit mjekësor ka gjashtë humbje jete me SARS-COV2 pozitiv: Një qytetar nga Kavaja 66 vjeç, një qytetar nga Berati 66 vjeç, tre qytetarë nga Durrësi 73-77 vjeç, një qytetar nga Tirana 85 vjeç”, kanë bërë me dije autoritetet shëndetësore.
