E fejuara e turistit italian të vdekur Matteo Sartori rrëfeu për mediat fqinje vdekjen e personit të saj të dashur.
Sonia Mercato, Këshilltare e Kulturës në komunën e Correzzolas (Padova) rrëfeu se ndihma erdhi tepër vonë për 33-vjeçarin. Sonia thekson se autoritetet shqiptare nuk kishin mjete për transport të menjëhershëm të Matteos.
“Në Shqipëri nuk kanë pajisje për t’u marrë me këtë lloj emergjence. Ata nuk arritën të vinin dhe të merrnin Matteon me një helikopter dhe u humb shumë kohë. Ne u lamë të vetëm në det. Ai ishte një person i mrekullueshëm, i pëlqyer dhe i vlerësuar. Që kur fatkeqësia ndodhi, nuk mund të fle më në shtëpinë tonë dhe kam shkuar te prindërit e mi”, tregon Sonia Mercato.
Në vazhdim të rrëfimit të saj, e fejuara e Matteo Sartorit zbuloi se ish-partneri i saj vuante nga hemofobia (frika prej gjakut). Ata po darkonin në kroçieren ‘’MSC Magnifica’’, kur Matteo preu gishtin teksa po tentonte të hapte një gaforre. Më pas, ai u nis drejt kabinës së tij për të fashuar plagën, por hemofobia mund t’i shkaktuar humbje të vetëdijes. Fatkeqësisht, ai goditi fort kokën te shkallët dhe pësoi traumë të rëndë.
Për sa i përket planeve të jetës së tyre, ato u prenë në mes pasi të dy po planifikonin të martoheshin së shpejti.
“Unë po organizoja dasmën tonë. Tani do të bëjmë funeralin e të dashurit tim. Jam i dëshpëruar ”, flet për planet e jetës së saj me 33-vjeçarin Matteo Sartori.
Sonia tregon më tej se i kanë dhuruar organet e Matteos, ndërsa datën e funeralit nuk e kanë përcaktuar akoma.
Aksidenti fatal ndodhi në mbrëmjen e 7 shtatorit. Sonia njoftoi Kapitenerinë e Portit të Durrësit, të cilët e transportuan Matteo Sartorin me peshkarexhë në tokë. Pasi u mjekua në Spitalin e Durrësit, turisti italian u nis për kurim të specializuar në Tiranë. Mjekët shqiptarë nuk mund t’i ofronin trajtim mjekësor ekstra dhe Matteo u dërgua në Itali në spitalin e Padovas. Për shkak të traumës së rëndë, ai vdiq para dy ditësh.
