Nëntëmbëdhjetë vjeçari Drin Leku nga fshati Baincë i Drenasit ka ndërruar jetë natën e mbrëmshme në Qëndrën Klinike Universitare të Kosovës.
Sakaq, familjarët e të riut po bëjnë përgjegjës për vdekjen e djalit të tyre mjekët e spitalit, pasi sipas tyre janë treguar neglizhentë.
Babai i Drinit, Rrustem Leku thotë se javën e fundit e kishte dërguar disa herë të birin për kontrolle në QKUK, por mjekët i kishin thënë se nuk është e nevojshme pasi i riu nuk kishte diçka serioze.
“Kur e kanë bërë operacion thanë se e ka gjendjen e rendë shumë, thanë ky e kish pasë një problem kur u hy në operacion, kish pas thyerje të zorrëve edhe më nuk kanë punu”, ka thënë Leku për Televizionin 7.
Babai i të ndjerit thotë se po të operohej me kohë, tani djali do të ishte i gjallë.
“Këto shkaqe kanë ardhë për shkak të vonesës. Dy ditë përpara ta ndalshin ka pasë mundësi djali me shpëtu para se me iu infektu zorrët. Këta që e kanë ba operacion nuk kanë pasë faj, po këta që nuk e kanë rrokë në dorë edhe që e kanë ba gabimin para dy vite e gjysmë”.
Babai i Drinit të ndjerë, kërkon që rasti të zbardhet sa më shpejt nga organet përgjegjëse ku edhe e ka denoncuar rastin.
