Një shtetas italian pak ditë më parë ka ndërruar jetë pak ditë pas një ndërhyrjeje bariatrike për zvogëlimin e stomakut të kryer në një spital privat në Tiranë.
Sipas reagimit zyrtar të Trita Hospital, operacioni është realizuar nga një ekip i specializuar dhe në përputhje me protokollet mjekësore në fuqi.
Në ditën e katërt pas ndërhyrjes, pacienti ka shfaqur çrregullime të ritmit kardiak dhe është dërguar për trajtim më të specializuar në QSUT “Nënë Tereza”.
Pavarësisht përpjekjeve të mjekëve, ai ka pësuar arrest kardiak dhe ka ndërruar jetë.
Pas ngjarjes, autoritetet kanë sekuestruar dokumentacionin mjekësor dhe kanë nisur hetim penal për të zbardhur rrethanat.
Trita Hospital nëpërmjet deklaratës zyrtare për mediat ka deklaruar se po bashkëpunon me organet hetimore dhe ka hedhur poshtë pretendimet për heqje organesh, duke sqaruar se autopsia po kryhet sipas procedurave ligjore nga Instituti i Mjekësisë Ligjore.
