Me lule dhe fotografitë e Arielës në duar, të rinj dhe aktivist të të drejtave të njeriut në Lezhë, kanë zhvilluar një marshim homazh në përkujtim të studentes 21-vjeçares, e cila mesditën e së dielës u qëllua për vdekje nga shoku i saj Aldison Belulaj.
Të pranishmit lëvizen në këmbë përgjatë bulevardit Gjergj Fishta dhe më pas ndezën qirinj pranë obeliskut të Besëlidhjes, ndërsa kanë kërkuar sensibilizimin e shoqërisë për t’ju dhënë fund ngjarjeve të tilla.
Vrasja e Ariela Muratit nga shoku i saj para fakultetit të Mjekësisë në Tiranë, tronditi mbarë opinionin publik, të cilët e kanë dënuar ashpër këtë krim.
Një aktiviste shprehet se “këto tre ditë kemi përjetuar një tragjedi, vrasjen e një studente të re. Krimi nuk do justifikim, madje edhe mbrëmë i është shpëtuar edhe jeta e një vajze në Malësi të Madhe.
Nuk i vjen mirë asnjërit dhe për fatin e djalit, por ne po flasim për ndjenjën më të madhe që është jeta sepse kur je gjallë mund të rregullosh shumë gjëra. Do ta përfundojmë këtë marshim me ndezjen e qirinjve për shpirtin e Arielës. Historitë e vrara si Ariela janë shumë por janë të njëjta. Morali është jeta, mbrojtja e jetës së dikujt dhe nuk është biografia. Në këtë vend po dhunohen edhe viktimat, të cilat 90 % janë vajza.
Nuk ka vrasje në emër të dashurisë, por ka jetë, komunikim, ka tolerancë dhe falje. Duhet ndryshuar dhe koncepti i mbrojtjes së dashurisë. Të gjitha strukturat e shtetit, në momentin që identifikohet një kërcënim duhet ndaluar menjëherë.
Do të doja të thosha diçka për djemtë shqiptar, ta venë Arielën në vendin e motrës së tyre dhe të shikonin se si do të ndjeheshin. Nuk duhet të justifikojnë asnjë vrasës. Duhet të ngrihemi të gjithë në këmbë që të protestojmë”.
