Ish-kryeministri Sali Berisha, pasi deklaroi se do të padisë në një gjykatë franceze Sekretarin amerikan të Shtetit, Antony Blinken, tha se ai s’ka prova për korrupsionin e pretenduar që çoi në shpalljen non grata të ish-kryeministrit.
Berisha tha se pret që Blinken të nxjerrë çdo provë që ka në gjykatë, por shtoi se s’do të njohë ato prova “të montuara në Tiranë te zyra e Edi Ramës”.
“Kërkova që të paraqitej një fakt i vetëm, por s’kishin asnjë. Zero. Ndaj dhe prap së prap nuk humbas, do të bëj çdo përpjekje që të paraqiten në gjykatë provat ndaj meje.
Nëse sekretari i shtetit do të paraqiste prova, do të konsideroja çdo gjë, por jo prova të montuara, jo prova të montuara në Tiranë te zyra e Edi Ramës. Provat le t’i nxjerrin, unë kam hap një gjyq, le t’i paraqesin para gjykatës. Ai është diplomati më i fuqishëm në botë, unë jam një njeri privat, por që besimin te drejtësia e kam të paanshëm”, deklaroi ish-kryeministri Sali Berisha.
