Ambasada e Turqisë ka siguruar kurimin e plotë të efektives, Ina Nuka, e cila u dëmtua rëndë në dorë në protestën e 22 nëntorit 2018. Ajo do të niset për një ndërhyrje të dytë, ndërsa pas një takimi me Ambasadorin e Turqisë u shpreh se nga ngjarja është bërë edhe më e fortë dhe se do të vazhdojë detyrën.
Efektivja, Ina Nuka, e cila mbeti e plagosur me kapsollë në protestën e 22 nëntorit që u zhvillua para Kuvendit do të riniset drejt Turqisë, ku do ti nënshtrohet një operacioni të dytë.
Pas një takimi të zhvilluar me ambasadorin Yoruk, ku shoqërohej nga drejtori i Policisë së Shtetit, Ardi Veliu, ajo theksoi se kjo ngjarje e ka bërë më të fortë dhe se nuk do tërhiqet nga detyra e punonjësit të policisë.
Ina Nuka: Kjo është një nga ngjarjet që më ka bërë akoma më të fortë për tu rikthyer dhe pse çfarë më rrethon apo njerëzit që mundohen të më tregojnë që më duan shumë dhe më thonë që nuk do të kthehesh, por kjo është e pamundur. Do të kthehem dhe shumë më mirë se ç’isha.
Në fjalën e tij ambasadori i Turqisë në Tiranë Murat Ahmet Yörük shprehu gatishmërinë për ti ndihmuar shqiptarët.
Murat Ahmet Yörük: Ne kemi bërë vetëm atë që kërkon miqësia dhe vëllazëria jonë e përjetshme. Ashtu si në të kaluarën dhe në të ardhmen ne do të jemi gjithmonë pranë për të ndihmuar dhe mbështetur vëllezërit tonë shqiptarë.
Drejtori i Policisë së Shqipërisë, Ardi Veliu, nga ana e tij shprehu falenderimet për Ambasadorin dhe Turqinë, të cilët kanë ofruar ndihmën për operacionin e efektives Nuka.
