Donjet Beqiraj është shumë i ri por arriti të çojë pas hekurave vrasësin e vëllait të tij. Rreth një muaj pas ngjarjes së rëndë në Fier, ku u zbulua krimi makabër i vrasjes së 36-vjeçarit Kreshnik Beqiraj, i cili u masakrua nga shoku i tij Albert Zekaj disa muaj më parë por pjesët e trupi u zbuluan vetëm në fillim të marsi, Donjeti ka rrëfyer në emisionin “Me zemër të hapur” në News24 përballjen me vrasësin.
Ai tha se ka bërë një takim të shkurtër me Albert Zekaj ku e ka pyetur për të vëllain por se ai nuk e ka parë asnjë erë në sy.
“Me bashkëpunimin e Prokurorisë kam pasur një kontakt shumë të vogël me Albert Zekaj. Ishte ndihmë për shtetin. Kishte 7 muaj që na shmangej. Daja im e kërkoi dhe ai u largua vajti në Tiranë. Takimi im me të ka qenë i shkurtër por ka qenë përfundimtar. Ndodhi ditën kur pranoi krimin, në policinë e Fierit.
Reagimi i tij ishte që shikonte tavanin, tokën, majtas djathtas. Nuk më shikonte në sy. E pyeta ku është vëllai im, pse nuk më je përgjigjur. Nuk mu përgjigj.
Bëra shumë durim, isha i përmbajtur. Qetësinë e gjeta tek ajo që doja të gjeja vëllain tim. Për të bërë keq është shumë kollaj. Me agresivitet nuk fiton kurrë”, tregoi 26-vjeçari Donjet Beqiraj, vëllai i viktimës.
Ai tha se për zbulimin e vrasësit kanë ndihmuar shumë dëshmitarë por edhe rrethanat. Kjo, pasi banesa ku hetonte Kreshniku me Albertin ishte në një zonë të populluar të Fieri.
“Të gjithë dëshmitarët kanë ardhur me karta identiteti në policinë e Fierit për të ndihmuar. Pallati ku jetonin është në qytetin e Fierit, një pallat i ri, afër me Tatimoren e qytetit dhe një zyrë shtetërore. Është pozicion i vështirë që të bësh lëvizje pa parë njeri gjë. Është një lagje e populluar. Ka shumë lëvizje. Kishte kamera sigurie tek pallati. Kur nuk u pa vëllai im dhe panë Albert Zekaj që lëvizte me mjetin e vëllait tim iu ra shumë në sy. Atë ditë që u bë vrasja ky nuk është parë 4 ditë në lagje. Rrethi shoqëror ndihmoi shumë për këtë çështje”, tha Donjeti.
Ai tregoi se vëllai i tij dhe Alberti ishin njohur në një kamp kthimi në Belgjikë dhe se Kreshniku i kishte ofruar ndihmë dhe e kishte strehuar për rreth 2 vjet.
“Vëllai me vrasësin kishin 2 vjet që ishin njohur në një kamp kthimi në Belgjikë. Vëllai im i ka ofruar ndihmë Albertit se kishte probleme familjare.
Por kohët e fundit vëllai im i kishte thënë që duhet të dilte nga shtëpia sepse nuk e mbante dot më. Kohët e fundit nuk kanë shkuar mirë me njeri-tjetrin. Por mendoj që vrasja nuk është për lekët. Nuk ma merr mendja se të gjitha i ka bërë vetë Alberti”, tha vëllai i viktimës.
Donjeti ende po kërkon pjesët e pagjetura të trupit të vëllait të tij. Koka dhe disa pjesë të tjera ende nuk janë mbledhur dhe i vëllai po kërkon me miqtë për t’i kryer ceremoninë mortore.
