Lufta në Ukrainë ka hyrë në ditën e 16 të saj, me sulmet e shumta të ushtrisë së presidentit rus, Vladimir Putin. Emisioni “Wake Up” në Top Channel, i dedikon çdo ditë kohë situatës aktuale në Ukrainë.
Mëngjesin e sotëm ishte live nga Kievi një çift që ka vendosur që të martohet pikërisht ditën e parë që ka nisur lufta. Ata u shprehën se donin që të mbronin njëri-tjetrin e prandaj vendosën që të martoheshin.
Çifti gjithashtu tregoi se situata për momentin në qendër të Kievit ishte e qetë, por në kufijtë e qytetit kishte luftë.
“Tani jemi në Kiev, në qendër të qytetit. Shumë pranë institucioneve qeveritare. Nuk kemi shumë mundësi të takojmë familjarët tanë, pasi nuk lejohet të largohet nga ky vend. Nuk kemi parë qytetin apo familjarët. Janë mirë, të lodhur dhe të stërmunduar për shkak të punës që kanë për të bërë. Por janë mirë, kjo është gjë e mirë”, tha nusja.
Ndërsa dhëndri shtoi: “Në qendër të Kievit aktualisht situata është e qetë, mirëpo në kufijtë të Kievit ka luftë. Kur isha në pozicionin e kufijve të Kievit kishte 10-15 orë luftime. Situata nuk është e mirë. Por në qendër situata është e qetë. Për momentin në qendër të Kievit është qetë. Sërish ka sulme dhe sirena”.
Të pyetur nëse kanë pasur eksperiencë më parë me armët, vajza u shpreh se “jo”.
“Nuk kam pasur eksperiencë me armët dhe nuk jam aq e fortë fizikisht, kështu që nuk kam shkuar në luftim. Duhet të jesh aq e fortë sa pjesa tjetër e skuadrës. E nëse nuk je aq e aftë, mund të vësh të tjerët në rrezik. Por bashkëshorti ka pasur, babai i tij ka punuar me diçka të tillë në ushtri dhe i ka mësuar se si të përdorë armët”, shtoi ajo.
Më pas çifti që u martua ditën e parë të luftës dhe vendosi që të luftonte për të mbrojtur vendin e tij tha se “do të qëndronin aty deri në fund”.
“Të gjithë këtu, forcat e mbrojtjes janë gati të qëndrojnë këtu për të luftuar. Do qëndrojmë aq sa duhet të qëndrojmë. Është toka jon. Do rrimë këtu deri në ushtarin e fundit. Nëse ata do vazhdojnë të vendosin eksplozive në Çernobil, sërish nuk mund të fshihesh nga rrezet dhe do të mendojmë se çfarë mund të bëjmë. Por ne do luftojmë për vendin tonë”, thanë ata.
