Molotovë, fishekzjarrë, gaz lotsjellës, përplasje, kaos e tension ishte panorama e protestës së mbrëmshme të zhvilluar nga opozita para Kryeministrisë dhe Kuvendit, ku 16 efektivë policie u plagosën dhe u dërguan në spital për të marrë ndihmën e nevojshme mjekësore.
Drejtori i Përgjithshëm i Policisë së Shtetit, Ilir Proda, gjatë vizitës në Repartin e Djegieve, për të parë nga afër, së bashku me Ministren e Punëve të Brendshme, Albana Koçiu, punonjësit e Policisë të dëmtuar gjatë protestës, iu ka uruar atyre shërim sa më të shpejtë.
Gjatë një prononcimi për median, ai ka falënderuar punonjësit e Policisë për profesionalizmin, sakrificën, durimin dhe maturinë e treguar përballë një barbarie të tejskajshme me bomba molotov, lëndë piroteknike dhe sende të forta, ku për pasojë u lënduan 16 punonjës policie.
“Falënderim për të gjithë punonjësit e Policisë për profesionalizmin që kanë treguar dhe vetëm Zoti e di sa krenar jam për ta, për atë që ata bëjnë çdo ditë dhe për vetëpërmbajtjen dhe qytetarinë e tejskajshme që treguan sot, në kundërshtim me atë me të cilën u përballën, e cila ishte shenjë e një barbarie ekstreme”, deklaroi Proda.
Pyetur mbi praninë e të miturve në protestën e opozitës, të cilët u shfaqën duke kryer veprime të dhunshme ndaj policisë, Proda deklaroi se hetimet sapo kanë filluar dhe ekipet po kryejnë këqyrjen e vendit të ngjarjes.
“Ne, në vazhdimësi, kemi bërë thirrje që të miturit të distancohen. Do të nxjerrim përgjegjësitë në bashkëpunim me Prokurorinë e Tiranës dhe besoj se edhe në vijim do të kemi qëndrime për këto situata”, tha ai teksa shtoi se nuk ka ende informacione nëse ka apo jo protestues të plagosur.
