Mbrëmjen e sotme në “Sheshin e Flamurit” në Vlorë po mbahet ceremonia solemne e përkujtimit të Luftës së Vlorës, si sot 100 vite më parë.
Të pranishëm janë shumë figura politike të vendit, përfshirë kryetarin e Kuvendit Gramoz Ruçi, kryeministrin Rama dhe presidentin e Republikës Ilir Meta.
Gjatë fjalës së tij, si çdo herë Rama nuk ka nguruar të bëjë dhe batuta, kësaj herë me kolegun e tij Ruçi. Të gjithë të pranishmit kanë qeshur, përfshirë presidentin Meta, i cili së fundmi ka nisur sërish debatet virtuale me qeverinë dhe vetë Ramën.
“Vlonjatëve duhet t’u jemi borxhlinj, jo vetëm për diçka që në vetvete është shumë e madhe, Pavarësisë. Por dy herë borxhlinj për dy arsye të Luftës së Vlorës. Gramoz mos m’u mërzit se nuk e përjashton kjo të ndjerit borxhli ndaj Tepelenës që gjithmonë e ka ndihmuar Vlorën ose ka ditur të udhëheqë në Vlorë në ditë të caktuara, mbi gjemba kuptohet, por ia ka dalë”, tha Rama.
