Ministrja e Infrastrukturës dhe Energjisë Belinda Balluku fiton “betejën” me Covid-19 dhe kthehet në detyrë, raporton newsbomb.al. Ministrja po merr pjesë në mbledhjen që po zhvillohet aktualisht në Komisionin e Veprimtarisë Prodhuese.
Ka qenë ministrja ajo që ditë më parë ka njoftuar se ishte infektuar me Covid-19 dhe ishte vetëkarantinuar duke respektuar të gjitha protokollet shëndetësore.
Në fjalën e saj sot në Komision, Balluku ka folur veç të tjerash dhe për përmirëismin e rrjetit të energjisë, për të cilin ka thënë se sot në Shqipëri nuk ka asnjë zonë ku rrjeti nuk është mirëmbajtur. Por, ministrja nuk përjashtoi nevojën për investime pavarësisht mirëmbajtjes.
“Kemi arritur që blerja në import të jetë minimale. Duke rritur kapacityetet tona prodhuese, me ndërtimin e Skavicës, me teknologjinë e re me gazin e lëngshëm për të cilin po punojmë me Ambasadën Amerikane, shpresojmë që importi të ulet ndjeshëm, duke rritur mundësitë për investime dhe në zonat që kanë ngelur pa u mbuluar. Megjithatë, nuk ka asnjë zonë në Shqipëri që rrjeti nuk është mirëmbajtur, por ama nevojë për investime ka”, u shpreh ministrja Balluku.
