Një krim i rëndë është shënuar gjatë natës së kaluar në një familje në kryeqytet. Një 25-vjeçar ka plagosur me thikë dy prindërit e tij dhe është vetëhedhur nga kati i tretë i banesës, duke ndërruar jetë pas disa orësh në spital.
Pas ngjarjes, i riu përfundoi në spital në gjendje të rëndë, por nuk mundi të mbijetojë, ndërsa vijojnë të qëndrojnë në spital edhe prindërit e tij, të cilët ndodhen jashtë rrezikut për jetën. Ngjarja ka ndodhur në rrugën “Nasi Pablo”, ndërsa policia vijon hetimet për të zbardhur të vërtetën e sherrit mes djalit dhe prindërve të tij.
Sipas burimeve policore dhe asaj çka kanë dëshmuar familjarët në Polici, i riu pasi është grindur me prindërit i ka qëlluar disa herë dhe në gjende të rënduar psikologjike ka ndërmarrë aktin fatal, që i ka kushtuar jetën.
Informacioni paraprak i policisë:
Më datë 05.05.2018, rreth orës 22:05, është dërguar në QSUT shtetasi B. S., rreth 25 vjeç, në gjendje të rëndë, i hedhur nga kati i tretë i banesës në rrugën “Nasi Pablo”.
Gjithashtu kanë shkuar në spital, të dëmtuar me mjet prerës, i ati, shtetasi E. S., rreth 60 vjeç dhe e ëma, shtetasia A. S., rreth 53 vjeç. Nga hetimet e kryera deri tani rezulton se 25 vjeçari pas një grindje ka goditur babain dhe më pas nënën me thikë.
Pas këtyre veprimeve 25 vjeçari është vetëhedhur nga kati i tretë i banesës. Po punohet për zbardhjen e plotë të rrethanave dhe shkaqeve të ngjarjes.
