Gentian Gjonaj, i arrestuar tek protestat e banorëve të Astirit pasi ndezi goma dhe tentoi të ushtronte dhunë ndaj një efektivi, ndonëse nuk është banor i saj zone, i është bashkuar protestës së studentëve.
Gjonaj, pjestar i “grupit të zjarrit” të FRPD, një militant i vendosur i Partisë Demokratike dhe folës në çadrën e opozitës, është midis të infiltruarve partiakë që po tenton të kthejë të dhunshme protestën paqësore të të rinjve.
Pak orë më parë, Gjonaj ka postuar foton e tij nga protesta e studentëve dhe është pjesë e militantëve që të maskuar si studentë kanë shkuar tek Zogu i Zi me qëllim krijimin e precedentëve të dhunës.
Së bashku me të, një numër prej të rinjve të FRPD, të cilët u panë në kamera në protestën e banorëve të Unazës së Madhe janë aktualisht të maskuar si studentë tek Zogu i Zi dhe kanë urdhër që të shfrytëzojnë situatën për të provokuar forcat e rendit.
Partia Demokratike është përpjekur për një javë rresht që të bindë studentët të protestojnë përpara Kryeministrisë, si dhe të tërheqë ata në një lëvizje të kryesuar prej saj.
Përballë refuzimit kategorik të studentëve për t’i dhënë protestës së tyre ngjyrime politike, duket se opozita ka kaluar në një skenar të dytë.
Aktualisht, përveç anëtarëve të organizatave rinore të PD dhe LSI, tek “Zogu i Zi” mësohet se janë të pranishëm edhe policë bashkiakë të Bashkisë së Kamzës dhe administratë e Bashkisë së Vorës, të dyja këto të kontrolluara nga Partia Demokratike.
