Ekstradohet nga Belgjika, Mario Çela, i cili u arrestua nga autoritetet belge në nëntor të vitit 2024. Vëllai i Suel Çelës ka mbërritur në Rinas këtë mbrëmje, 12 shkurt.
Ai u arrestua nga autoritetet belge në kuadër të operacionit të SPAK, i cili lëshoi në atë kohë 21 urdhër arreste, mes të cilëve edhe Suel Çela.
Sipas SPAK, Suel Çela, është identifikuar si drejtuesi i një organizate, përgjegjës për menaxhimin dhe koordinimin e aktiviteteve kriminale, përfshirë vrasjet, trafikimin ndërkombëtar të drogës, kryerjen e veprimeve korruptive dhe organizimin e skemave të pastrimit të parave.
OPERACIONI I SPAK
Organizata kriminale e Suel Çelës u godit nga SPAK në fund të nëntorit 2024. Asokohe u lëshuan 21 urdhër arreste. Sipas SPAK, organizata vepronte kryesisht në Shqipërinë e Mesme me synim kontrollin e territorit dhe eliminimin e grupeve rivale në Elbasan.
Aktiviteti i saj financohej nga trafiku ndërkombëtar i kokainës nga Amerika Latine drejt vendeve të BE-së, si Gjermania, Italia, Belgjika, Holanda dhe Mbretëria e Bashkuar.
Organi i akuzës arriti të dokumentonte një vrasje e mbetur në tentativë me snajper në Elbasan, sigurim kushtesh për vrasje të tjera në vitin 2020, dy tentativa për trafikimin e rreth 930 kg dhe 466 kg kokainë nga Ekuadori drejt Europës nga viti 2020–2021. Po ashtu, SPAK e akuzoi bandën se ushtronte ndikim përmes korrupsionit në polici, sistemin gjyqësor dhe media.
