Presidenti amerikan, Donald Trump ka kërkuar që Rusia të kthehet në grupin e kombeve më të industrializuara, që njihet si G7, pasi u përjashtua për shkak të aneksimit të gadishullit ukrainas të Krimesë në vitin 2014.
Trump i bëri këto deklarata në Uashington ndërkohë që po nisej për në samitin e G7-ës në Kanada, që pritet të fokuesohet në bisedime të tensionuara mbi tregtinë. Aleatët e SHBA-së do të përpiqen të bindin Trump të heqë tarifat mbi çelikun dhe aluminin të vendosur kohët e fundit, që mund të sjellë një luftë tregtare.
“Rusia duhet të jetë në këtë takim. Përse po zhvillojmë një takim pa Rusinë të pranishme?”, thotë Trump.
“Duhet të kemi Rusinë në tavolinën e negociatave”, vazhdoi ai.
Vetë Trump rrezikon të jetë i izoluar në këtë samit dhe pritet të largohet më herët për në Singapor për përgatitjen e bisedimeve me Korenë e Veriut në lidhje me armët e saj bërthamore.
