Presidenti amerikan Donald Trump ka lëshuar një urdhër ekzekutiv, duke kërkuar bllokimin e të gjitha fondeve federale për Shërbimin Publik të Transmetimit (PBS) dhe Radion Publike Kombëtare (NPR), raporton BBC. Mbrëmjen e së enjtes, Trump pretendoi se të dy organizatat janë angazhuar në “mbulim lajmesh të anshme dhe partiake”.
Me këtë vendim, Trump udhëzon bordin e Korporatës së Transmetimeve Publike, e cila shpërndan fondet për stacionet PBS dhe NPR, që të ndërpresë financimin e drejtpërdrejtë në “masën maksimale të lejuar me ligj”. Sipas urdhërit, bordi duhet të refuzojë ofrimin e fondeve në të ardhmen për organizatat e lajmeve.
“Nuk ka rëndësi se cilat pikëpamje promovojnë NPR dhe PBS. Ajo që ka rëndësi është se asnjëri entitet nuk u paraqet qytetarëve taksapagues një portretizim të drejtë, të saktë ose të paanshëm të ngjarjeve aktuale”, thuhet në urdhër.
Sipas vlerësimeve të tyre, më shumë se 40 milionë amerikanë dëgjojnë radion publike NPR çdo javë dhe 36 milionë shikojnë një stacion televiziv lokal nga rrjeti PBS çdo muaj. Drejtoresha e NPR-së, Katherine Maher, vlerësoi në mars se stacioni radiofonik do të merrte rreth 120 milionë dollarë nga CPB në vitin 2025, më pak se 5% të buxhetit të tij.
Të dyja organizatat kanë thënë më parë se përpjekja e Trump për të shkurtuar fondet mund të ketë një ndikim shkatërrues tek ata që mbështeten tek ato për lajme të besueshme, përfshirë gjatë situatave të emergjencës. Grupi për të drejtat e medias, RSF, paralajmëroi të premten për “një përkeqësim alarmues të lirisë së shtypit” në Shtetet e Bashkuara nën presidencën e Trump dhe vështirësi për gazetarët e pavarur në të gjithë botën.
