Unë personalisht trikot i kam mbajtur vetëm për në shtëpi, madje për t`i bërë qejfin mamit më shumë. Gjyshet e mia bënin plot punime dore me modele, gërsheta, drerë dhe lule, të cilat i mbaja sa për sy e faqe, jo se kisha ndonjë afeksion për materialin e leshtë. Përpos materialit i cili më bënte alergi, nuk më pëlqente vetja me gjithë atë shtresë të trashë. Dukeshe si njeri prej bore, ose si dordolec. Këtë sezon ky është dhe qëllimi i këtij trendi, të dukesh si i shkujdesur pa e vrarë mendjen. Mund ta kombinosh me një rrip rreth belit për t`u dukur sikur vjen nga Parisi.
Se që do vishja kaq shumë triko leshi nuk ma kishte marrë mendja ndonjëherë. Gri, lejla, rozë, portokalli, bojëqiell, blu, esmerald dhe të zezë janë thjesht blerjet e para të sezonit. Në fakt janë kaq komode dhe të ngrohta sa nuk krahasohen as me xhaketat me material të leshtë.
Një si ato trikot që bënte gjyshja ime, sot fillon nga 200 euro më e lira dhe janë mall serie, po qe se do ishin hand-made kushedi sa do e kishin vlerën. Mund ta veshim në mëngjes me xhinset e preferuara, ta kombinojmë me fund laps si dhe me fustanin satin nëpër ceremoni e festa.
Ja që e kemi paragjykuar trikon, e cila u shndërrua në must që pas sfilatës së Dior të vjeshtë-dimër `17-`18. Po si ta personalizojmë? Mund t`i qëndisim ndonjë detaj, ose t`i shtojmë një spilë interesante. Për më tepër, nuk ka moshë, mund ta veshë një adoleshente si dhe një zonjë, sigurisht me pak modifikime.