Vrasja e 19-vjeçares Xhuljeta Çuni të premten e 8 qershorit në rrugën Don Bosko në Tiranë, duket se ka qenë një krim i paralajmëruar të paktën një muaj më parë.
Autori që vrau të renë dhe më pas qëlloi edhe veten, ishte denoncuar nga viktima për përndjekje në mënyrë të përsëritur.
Çështja ishte dërguar në prokurorinë e Tiranës për vlerësim por ende nuk dihet cili ka qenë fati i denoncimit të bërë nga Xhuljeta Çuni e cila tregonte në kallëzimin e bërë në polici se përndjekja kishte nisur pasi i kishte dhënë fund lidhjes me Xhafer Matën.
Në komunikatën e policisë të datës 7 maj 2018, thuhet se komisariati nr.3 ka referuar në prokurorinë e Tiranës denoncimin që 19-vjeçarja kishte bërë ndaj shtetasit Xhafer Mata, i cili i mori jetën një muaj më vonë.
Sipas komunikatës, pas marrjes së denoncimit, u referuan materialet në Prokurorinë pranë Gjykatës së Shkallës së Parë Tiranë, për shtetasin Xhafer Mata, 31 vjeç, banues në Tiranë, pasi në mënyrë të përsëritur, në kohë e vende të ndryshme, ka përndjekur ish të dashurën Xhuljeta Çuni, 19 vjeçe.
Burimet zyrtare thonë se autori i krimit të dyfishtë që ndodhi mëngjesin e 8 qershorit në rrugën Don Bosko ishte shoqëruar në komisariatin nr.3 në Tiranë në datën 8 maj, një ditë pas denoncimit të bërë nga gjimnazistja Xhuljeta Çuni.
Por pas marrjes në pyetje ai më pas ishte lënë i lirë ndërsa prokuroria nuk kishte kërkuar caktimin e ndonjë mase sigurie ndaj tij në lidhje me padinë e 19-vjeçares për përndjekje.
Mësohet se gjatë marrjes në pyetje në komisariatin e policisë, Xhafer Mata kishte mohuar ta kishte përndjekur gjimnazisten e shkollës Qemal Stafa ndërsa kishte pranuar se mes tyre kishte një lidhje disa vjeçare.
Vetëm dy javë më vonë, në datën 21 maj 2018 Xhafer Mata e kishte kallëzuar penalisht në polici 19-vjeçaren duke kërkuar që ajo ti kthente një sasi monetare në monedhën britanike paund të cilën ai pretendonte se ia kishte dhënë të resë.
