Katër shtetas shqiptarë humbën jetën dhe një tjetër u plagos rëndë në një kantier të madh ndërtimi në Hafencity të Hamburgut të hënën.
Shqiptarët ishin duke punuar me dokumente false bullgare kur ndodhi tragjedia e rëndë.
Tani sindikata e punëtorëve në Gjermani po përpiqet të ndihmojë të afërmit e punëtorëve shqiptarë.
Andre Grundmann, menaxheri rajonal nga sindikata IG BAU në një intervistë për mediat gjermane tha se ai ka hapur një llogari bankare për të ndihmuar të afërmit e shqiptarëve për të përballuar sado pak këtë tragjedi.
Ai tha se iniciativa për të hapur këtë llogari ka ardhur nga banorët e Hamburgut të cilët kanë shprehur dëshirën për të ndihmuar familjet e shqiptarëve.
Kemi dëgjuar se banorët e Hamburgut kanë pyetur se si mund të ndihmojnë të afërmit e mbijetuar të punëtorëve të vdekur të ndërtimit. Si Sindikata Industriale Ndërtimore-Agrar-Mjedisore, ne kemi krijuar një llogari donacionesh dhe do të transferojmë çdo cent që shkon në këtë llogari donacionesh tek vartësit e mbijetuar për mbështetje.
Rikujtojmë se aksidenti ku humbën jetën shqiptarët ndodhi mëngjesin e së hënës rreth orës 9:10 në kantierin e madh të ndërtimit në Überseequartier. Një skelë me disa punëtorë ndërtimi në të ra nga kati i tetë në një bosht ashensori të brendshëm. Ende është e paqartë se përse është shembur skela. Specialistët e Policisë Kriminale të Shtetit kanë nisur hetimet për shkaqet e aksidentit.
