Apeli i Gjykatës së Posaçme i ndryshon dënimin kreut të njërit prej 4 grupeve kriminale të cilët trafikuan tonelata droge nga Shqipëria drejt Italisë. Bëhet fjalë për Ilirjan Duçellarin, i cili në shkallën e parë u dënua me 11 vite e 4 muaj burg. Sipas vendimit të fundit shkalla e dytë e Gjykatës së Posaçme, i rrit atij dënimin me 16 muaj më shumë, në total 12 vite e 8 muaj heqje lirie.
Nëpërmjet një njoftimi SPAK komunikon edhe konfiskimin e pasurive të Duçellarit. Në favor të shtetit, kalojnë një njësi rreth 70m2 ndodhur në Radhimë, dy apartamente me sipërfaqe 190 m2 në lagjen Pavarësia Vlorë, dhe një ndërtesë tre katëshe në lagjen Kushtrimi, po në Vlorë me sipërfaqe 124 m2.
Më herët Gjykata e Shkallës së Parë dënoi me burg edhe 7 anëtar të tjerë të grupit kriminal që trafikuan drogë nga Shqipëria drejt vendit fqinj. Aktiviteti i tyre u shtri nga viti 2014 deri në vitin 2019, që u godit në operacionet ‘Shpirti’ dhe ‘Kulmi’ të finalizuar në mars të 2018 dhe në qershor të 2020.
I gjithë aktiviteti kriminal, u rindërtua edhe me ndihmën e deklaratave të katër bashkëpunëtorëve të drejtësisë, që zbuluan edhe shkelje të ligjit nga zyrtar publik shqiptarë, pastrim parash, por edhe gjithë zinxhirin e prodhimit të lëndës narkotike që nga kultivimi, prodhimi, mbledhja, magazinimi dhe trafikimi në drejtim të brigjeve pugliese me mjete lundruese të fuqishëm.
Në kuadër të hetimeve, u sekuestruan rreth 6 ton lëndë narkotike të tipit marijuanë, kokainë e hashash, duke ju hequr organizatave kriminale të ardhura të vlerësuara në mbi 55 milion Euro, për një sasi totale prej rreth 14 milion dozash njëshe që dalin nga shpërndarja me pakicë. Gjithashtu autoritetet sekuestruan me qëllim konfiskimin pasuri të paluajtshme dhe të luajtshme, subjekte tregtare, ambiente biznesi, në një vlerë prej 10 milion Euro.
Dënimet:
Aurel Kalari – 13 vjet burgim/8 vjet e 8 muaj burg.
Kleo Bregu – 13 vjet burgim /8 vjet e 8 muaj burg.
Orhan Duçellari – 13 vjet burgim/ 8 vjet e 8 muaj burg.
Julian Bejdollari – 13 vjet burgim/ 8 vjet e 8 muaj burg.
Rexhino Muça – 13 vjet burgim/ 8 vjet e 8 muaj burg.
Alban Koshi – 12 vjet burgim/ 8 vjet burgim.
Mariglen Duçellari – 5 vjet burgim/ 3 vite e 4 muaj.
Konfiskuar nga Gjykata:
Njësi 69.32 m2, ndodhur në Radhimë, Vlorë.
Apartament 56.80 m2, ndodhur në Lagjen “Pavarësia”, Vlorë.
Apartament, me sipërfaqe 134 m2, ndodhur në Lagjen “Pavarësia”, Vlorë.
Ndërtesë tre katëshe, me sipërfaqe 124 m2, ndodhur në Lagjen “Kushtrimi”, Vlorë.
