SHKUP- Kur ministri i Jashtëm i Maqedonisë, Nikolla Dimitrov, ka marrë fjalën në foltoren e Kuvendit për të shpjeguar marrëveshjen dhe përfitimet e saj, deputetët e VMRO-DPMNE kanë drejtuar akuza me thirrjet “tradhtar, tradhtar”, duke e akuzuar për shitjen e interesave kombëtare dhe shtetërore.
Deputetët me 69 vota për dhe 40 kundër gjatë votimit kanë miratuar nevojën që ky ligj të miratohet me procedurë të shkurtuar.Ministri Dimitrov tha se është e domosdoshme dhe në interes të vendit që kjo marrëveshje të miratohet në procedurë të shkurtuar.
“Është mëse e domosdoshme që ky ligj të sillet me procedurë të shkurtuar , që Greqi të informojë NATO-n për të na dërguar ftesën. Samiti është caktuar më 28 qershor, dhe kjo datë është kyçe për ne. Propozojë që ky ligj të miratohet sa më shpejt”, theksoi Dimitrov.
Nga ana tjetër, deputetët e VMRO-DPMNE theksuan se ky ligj është kapitullim për vendin.
“Kjo është kapitullim, marrëveshja është gjenocid bashkëkohor për ekzistimin tonë si komb. Ai është i njëanshëm dhe me marrëveshjen e re imponohet emër i ri i shtetit me nënçmim”, theksoi deputeti i VMRO-DPMNE, Dragan Danev. Deputetët e opozitës maqedonase pasi që kanë kërkuar pauzë, kanë braktisur punimet e Kuvendit.
