Mësuesit e Shqipërisë janë renditur ndër më të mirët në testimin ndërkombëtar TALIS, ku marrin pjesë 55 vende anëtare të OECD-së. Rezultatet e publikuara tregojnë një performancë shumë pozitive të mësuesve shqiptarë, duke i vendosur ata në nivelet më të larta të vlerësimit ndërkombëtar.
Në ceremoninë e publikimit të rezultateve, i pranishëm ishte edhe Kryeministri Edi Rama, i cili shprehu krenarinë për këtë arritje.
Erdha këtu me një kënaqësi të veçantë sepse është një lajm shumë i mirë”, tha Rama, duke vlerësuar përkushtimin dhe profesionalizmin e mësuesve shqiptarë.
TALIS (Teaching and Learning International Survey) është një ndër testimet më prestigjioze për vlerësimin e mësuesve dhe kushteve të mësimdhënies në nivel global.
“Erdha këtu me një kënaqësi të veçantë sepse është një lajm shumë i mirë për prindërit që në një anketim ndërkombëtar për mësimëdhënie dhe të nxënit mes 55 sistemeve arsimore në BE, në Europën përtej BE, përfshirë dhe vende jashtë BE, mësuesit tanë kanë dalë mirë dhe patjetër që kjo është merita e tyre, por është edhe një pasqyrë e përpjekjes që kemi bërë së bashku. Dhe besoj edhe e mbështetjes që ne jemi përpjekur t’i japim mësuesve në vazhdimësi në të gjitha drejtimet. Kjo anketë është një anketë shumë sfiduese e cila e thënë në mënyrë banale është anketa PISA për mësuesit, ndërkohë që PISA është për nxënësit. Dhe meqënëse në të gjitha shkallët e anketës rezultatet kryesore për Shqipërinë reflektojnë motivim të mësuesve, dëshirë për profesionin, besim në zhvillimin e aftësisë së nxënësve dhe konkretisht të gjitha këto në shkallën e formimit fillestar, në zhvillimin e vazhduar profesional, sigurisht që nuk kemi arsye pse të ndjehemi në vështirësi për të qenë krenar. Përkundrazi, ndihem krenar për ju, për gjithë mësuesit e Shqipërisë, për faktin që në një anketim kaq sfidues kemi dalë me rezultatet domethënëse pozitiv”, tha Kryeministri Edi Rama.
