Gjykata ka vendosur të lërë për 15 ditë në burg moderatorin Hermes Nikaj, i njohur ndryshe si “Zogu i Tiranës”, i cili akuzohet për prostitucion. Gjyqtarja Shefkia Demiraj i ka lënë prokurorisë afat 15 ditë që të zhvillojë një ballafaqim mes dy personave të tjerë, biznesmenit A. Gjini dhe vajzës D. N., që u kapën në orët e natës bashkë me “Zogun e Tiranës” në një dhomë hoteli.
Gjatë seancës gjyqësore, Hermes Nikaj është mbrojtur përmes avokatit Bardhi Koçi, por ka folur edhe vetë para trupës gjykuese. Ai pretenduar se nuk ka bërë asgjë të keqe e për më tepër të ketë shfrytëzuar vajza. Sipas tij, marrëdhëniet seksuale kryeshin me dëshirë.
Ndërsa avokati mbrojtës i tij, Bardhi Koçi tha për mediat se në fakt vetë moderatori është viktimë e kësaj ngjarjeje se ai bashkë me vajzën kanë shkuar me dëshirë në hotel.
“Nuk ka qenë pjesë e trafikut Hermesi, ai është viktimë e kësaj maskarade dhe gjykata duhet të ketë parasysh se ky djalë ka bërë të njëjtën punë si vajzat. Kur ka ndërhyrë policia, të tre personat nuk po kryenin marrëdhënie seksuale, por pinin shampanjë dhe ishin të veshur me mbathje”, deklaroi avokati Bardhi Koçi.
Kujtojmë që Hermes Nikaj u arrestua në 24 nëntor pas hetimeve 1-vjeçare të prokurorisë dhe akuzohet për veprat penale “Prostitucion” dhe “Shfrytëzim prostitucioni”.
Ndërkohë, gjykata ka dhënë masën e sigurisë edhe për pronaren e qendrës së estetikës në rrugën “Myslym Shyri”, Anjeza Bena. Ajo u la në arrest shtëpie, ndërsa arrestimi i saj u bë pasi rezulton në përgjimet telefonike të kryera nga prokuroria, duke folur me “Zogun e Tiranës” për vajzat dhe klientët.
Ndërsa për biznesmenin A. Gjini dhe 3 vajzat që ushtronin prostitucion është dhënë masa e sigurisë “Detyrim paraqitje”.
