Mediat e huaja vijojnë të kenë në qendër të sugjerimeve të tyre Shqipërinë si një nga destinacionet më të bukura për tu vizituar për 2026. E radhës është e përditshmja izraelite “Jerusalem Post” ku në artikullin e fundit shkruan se e shtrirë mes Ballkanit dhe Greqisë, Shqipëria ofron gjithçka që mund të ëndërroni: kulturë dhe histori të pasur, qytete bregdetare magjike me rërë të bardhë, udhëtime në zonat malore dhe shumë atraksione të tjera.
“Jerusalem Post” nënvizon në shkrim se vitet e fundit Shqipëria ka tërhequr gjithnjë e më shumë turistë, falë çmimeve të përballueshme dhe bregdetit të bukur dhe qyteteve historike dhe kjo është e dukshme për shkak të mbipopullimit në destinacionet evropiane si Italia, Greqia, Spanja dhe Portugalia.
Kryeqyteti i Shqipërisë, Tirana, u ofron udhëtarëve një kulturë unike dhe histori të pasur, një qytet që po transformohet me shpejtësi nga komunizmi i mbyllur në një qendër ballkanike plot gjallëri.
E përditshmja izraelite “Jerusalem Post” sugjeron edhe rivierën shqiptare me një vije bregdetare të mrekullueshme, ku keni mundësi të shumta të pushoni në plazhet me rërë të bardhë apo ato me guralecë ose të shkoni në një udhëtim me varkë për të zbuluar limane të fshehura.
Rekomandohet të vizitoni Kalanë e Porto Palermos të shekullit të 19-të ose sitin arkeologjik të Parkut Kombëtar të Butrintit, i njohur nga UNESCO.
“Jerusalem Post” në përmbyllje të artikullit për Shqipërinë rekomandon edhe Alpet Shqiptare. Për ata që duan qetësinë dhe natyrën sugjerohet të vizitojnë Luginën e Valbonës dhe Luginën e Thethit me peizazhet e egra dhe mahnitëse.
Gjithashtu mund të vizitoni edhe “Syrin Blu të Thethit”, një atraksion unik përfundon “Jerusalem Post”
