Zëvendës drejtori i DVP Tiranë, Luigj Vathi ka folur për tensionet e krijuara pasditen e sotme në protestën përpara Kryeministrisë.
Në një prononcim për mediat, Vathi thotë se nuk ka qenë urdhër për shpërndarjen e protestës, por vetëm për lirimin e rrugës për automjetetet.
“Unë dua të bëj një sqarim lidhur me mbarëvajtjen e protestës sot. Në bazë të njoftimit që kanë bërë organizatorët, DVP Tiranë ka marrë të gjitha masat për mbarëvajtjen e protestës deri në orën 17:00. Pas një kërkese të dytë nga organizatorët, ne u kemi kthyer përgjigje me shkrim duke i njoftuar për lirimin e rrugës dhe vazhdimin e protestës në trotuar. Ju garantoj që policia e shtetit nuk e ka shpërndarë protestuesit, por ka bërë thjesht lirimin e rrugës. Protestuesit vazhdojnë protestën në trotuarin përballë kryeministrisë. Kemi liruar rrugën për gjithë qytetarët e Tiranës dhe për mbarëvajtjen e automjeteve. Ju garantoj që çdo qytetar ka të drejtë të protestojë, po pa cenuar liritë dhe të drejtat e qytetarëve të tjerë. Ja u kemi kthyer përgjigjen. Nuk diskutojmë ligjshmërinë e protestës, ne kemi bërë thjesht lirimin e rrugës” – tha Vathi.
