Britania e Madhe po dërgon më shumë avionë ushtarakë në Lindjen e Mesme, mes përplasjeve të ashpra mes Izraelit dhe Iranit. Kryeministri britanik deklaroi se avionët po dërgohen “si mbështetje rezervë për të gjitha skenarët në rajon”. Britania tashmë ka avionë të Forcave Ajrore Mbretërore (RAF) të vendosur në zonë si pjesë e Operacionit Shader.
Gjatë udhëtimit të tij drejt Samitit të G7-ës që nis nesër në Kanada, Keir Starmer u tha gazetarëve se situata po zhvillohet me shpejtësi dhe se po zhvillohen diskutime intensive me aleatët në çdo nivel. “Mesazhi i vazhdueshëm është: të shmanget përshkallëzimi”, theksoi ai.
Diskutimet do të vazhdojnë sot dhe gjatë ditëve në vijim. Kryeministri nuk pranoi të japë një përgjigje të drejtpërdrejtë nëse Britania do të përfshihet në mbrojtjen e Izraelit. “Pata një bisedë të mirë dhe konstruktive me kryeministrin Netanyahu dje, dhe ajo përfshiu diskutime rreth sigurisë së Izraelit, siç do të pritej mes dy aleatëve.”
Ai përsëriti se Britania ka “shqetësime të hershme” për programin bërthamor të Iranit dhe njeh të drejtën e Izraelit për vetëmbrojtje.
