Anëtari i kryesisë së Partisë Demokratike, Eno Bozdo ka denoncuar procedurën për shpalljen e fituesit të tenderit për rrugën Fier Vlorë.
Bozdo deklaroi se Evis Berberi ka shpallur fituese kompaninë e katërt në garë me ofertën dy milion euro më të shtrenjtë se tre kompanitë e tjera.
Ai i bëri thirrje organeve të drejtësisë të dëshmojnë se janë organ i pavarur duke hetuar këtë aferë.
“Për riparimin e rrugës Fier Vlorë ARRSH nuk kursehet. Si t’i kishte para të trashëguara nga babai, Evis Berberi ia ka dhënë tenderin e rehabilitimit të rrugës jo ofertës më të mirë por të katërtën. 2 mln euro më shumë që nuk vijnë nga xhepi i tij, as i Ramës por i qytetarëve shqiptarë. PD denoncon një akt të tillë.
Tre pyetje që do bënte çdo qytetar: Pse kalohet te e katërta ofertë që kushton dy milion euro më shumë. Alarmi bëhet edhe më i fortë po të kujtosh borxhin publik të vendit. PD i bën thirrje organeve të drejtësisë të dëshmojnë një organ i pavarur dhe pushtet i pavarur jo një degë e thyer e qeverisë”, deklaroi ai.
Deklarata e plote e Enno Bozdos
Për riprarimin e rrugës së vjetër Fier-Vlorë, ARRSH nuk kursehet.
Sikur t’i kishte para të lëna trashëgim nga babai, Evis Berberi ia ka dhënë tenderin e rehabilitimit të rrugës, jo ofertës më të mirë prej 4. 5 milion euro, por të katërtës prej 6.5 milion.
Dy milionë më shumë, në euro që nuk vijnë nga xhepi i tij, as i Ramës, por i taksapaguesve shqiptarë.
Me dyshimin e fortë se nëse nuk dalin, një pjesë e tyre futen në xhepa zyrtarësh të korruptuar.
Autoriteti i Rrugëve mund të hynte në librin “Guinness” me vendimet anti-ligjore, të papërgjegjshme dhe të kushtueshme.
Partia Demokratike denoncon një akt të tillë, i cili nuk është i paprecedent për këtë qeveri, por nuk ka precedent në vende normale, ku qeverisja është transparente dhe llogaridhënëse.
Tre pyetje që do bënte çdo qytetar, dhe ne i përsërisim në emër të tyre, janë:
• Pse kalohet te e katërta në listën e ofertave dhe shmangen tri të parat?
• Pse zgjidhet një ofertë që kushton 2 milion euro më shumë se konkurueset?
• Pse nuk ka transparencë të vendimmarrjes?
Partia Demokratike kërkon vëmendje qytetare dhe të organeve të drejtësisë, për shpenzime të tilla abuzive, dhe rrjedhimisht, korruptive.
Alarmi bëhet edhe më i fortë, po të kujtosh borxhin publik të vendit, që po kap 100% – shin.
Partia Demokratike falenderon median që investigon dhe publikon akte korruptive të tilla, dhe i bën thirrje organeve të drejtësisë të dëshmojnë se janë në krye të punëve, dhe pushtet i pavarur, jo një degë e thyer e qeverisë.
