Parku Kombëtar Lugina e Valbonës gjatë këtyre ditëve të nxehta është destinacioni i preferuar nga turistët vendas dhe sidomos nga ata të huaj të cilët kanë zgjedhur të shijojnë bukuritë natyrore dhe freskinë që ky vend ofron.
Të rinjtë e grupit Smile Albania kanë kontaktuar, shoqëruar dhe informuar sot në këtë park grupe turistësh nga Amerika, Kanadaja, Franca, Polonia, Belgjika, Çekia.
Këta turistë kanë gjetur në këtë park mikpritje, janë njohur me traditën dhe janë mrekulluar nga bukuritë natyrore dhe shtigjet mjaft interesante për eksplorim që kjo zonë ka.
Në Parkun Kombëtar Lugina e Valbonës nuk ka vetëm rritje të fluksit të turistëve, por edhe një gjeografi të vizitorëve nga të gjitha kontinentet, që çdo ditë e më shumë po frekuentojnë këtë park.
Të pasionuarit pas turizmit malor mund të bëjnë një udhëtim të mrekullueshëm në këtë sezon në Parkun kombëtar të Luginës së Valbonës e cila të magjeps me pasurinë natyrore.
Tashmë ky park është shumë i vizituar jo vetëm nga të huajt, por edhe nga mjaft shqiptarë, të ngopur me detin e të etur për aventurë dhe që duan të eksplorojnë bukurinë malore.
Parku Kombëtar Lugina e Valbonës ndodhet në Qarkun e Kukësit dhe në rrethin e Tropojës, 25-30 km në veriperëndim të qytetit Bajram Curri.