Ajo që u tha se do të ishte e diela kundër Edi Ramës, ka nisur që tani që të jetë “Dita e Gjykimit” kundër Lulzim Bashës.
Aleatët e Opozitës së Bashkuar dhe personazhe të zëshëm brenda forumeve drejtuese të PD, e kuptojnë se sot kauza e Lulzim Bashës “ose ikën Edi Rama, ose shkrihet opozita”, po çon drejt alternativës së dytë.
Kryetari i LZHK Dashamir Shehi nis e numëron tri gabimet madhore të kryetarit të opozitës së rrugës: Reforma e ndarjes administrativo-territoriale, armiqësimi me perëndimin për shkak të reformës në drejtës dhe bojkoti i reformës elektorale
vlerësohen disa nga dështimet e opozitës nën udhëheqjen e Lulzim Bashës.
Ish zv. Ministrja e Jashtme e PD, Edith Harxhi ka thënë se 1 korriku do të jetë vonë për Lulzim Bashën, pasi ai e shndërroi partinë në një organizatë të dhunshme.
Anëtari i këshillit Kombëtar të PD, Edvin Kulluri shkon më tej kur i thotë Bashës që “je njësh për të qenë dysh” dhe se me të po humbasin të gjithë opozitarët dhe demokratët e vërtetë. Por ti mos u dorëhiq derisa të humbasin gjithçka të gjithë,- ironizon ai.
Këto zëra sa vijnë e shtohen, duke u inkurajuar edhe nga heshtja dy javore e Berishës, si dhe nga rritja e influencës së Bujar Nishanit brenda opozitës, i cili përflitet si pasaardhësi i mundshëm i Bashës në luftën e ardhshme për kreun e ri të Partisë Demokratike.
Zërat brenda kupolës së SHQUP, shprehen se ka edhe një ftohje të madhe mes Metës dhe Bashës, pasi thuhet se Presidenti Preferon paraardhësin e tij Nishani në përballjen opozitare me Ramën.
Përfundimi me sukes i 30 Qershorit, pritet të sjellë forcimin e mazhorancës dhe një verë të nxehtë për opozitën. Loja ka filluar, ende pa u hapur kutitë e votimit. Qëndrimi i SHBA pro 30 Qershorit, i vuri vulën lojës së re politike në Shqipëri, që nisi me çarjen e madhe brenda opozitës.
Ndërkohë, krijimi i Gjykatës Kushtetuese në korrik, pritet ta çojë klasën politike me një President të ri, përpara pushimeve verore të gushtit ose maksimumi në shtator.
/Marrë nga Alfred Pez@ blogu personal
