Bizneset me xhiro mbi 2 milionë lekë do të hyjnë në skemën e TVSH-së që pas 1 prillit të ardhshëm.
Si do të funksionojë skema e re e TVSH-së dhe kategoritë e përfshira i ka shpjeguar në një intervistë për për gazetën “Panorama” drejtori i përgjithshëm i politikave fiskale në Ministrinë e Financave, Niko Lera.
“Ligji takson pasuritë e paluajtshme, ndërtesa që mund të përdoren për qëllim banimi apo për veprimtari ekonomike, që do të thotë janë subjekt i taksës me tarifa të diferencuara apo me përqindje të caktuara të aplikimit të taksës. Ndërtesat që përdoren për veprimtari tregtare dhe shërbimesh kanë dyfishin e vlerës krahasuar me ndërtesat që përdoren për banim. Pra, edhe për lloje të tjera veprimtarish janë përcaktuar dhe janë ende në diskutim përfundimtar disa çështje me bashkitë dhe faktorë të tjerë në mënyrë që të arrijmë në maksimumin e mundshëm te vlera reale e tregut dhe taksimi të jetë i ndershëm për këdo,” tha Lera.
Ai u shpreh optimist për zbatimin e këtij ligji duke thënë se: “jemi të bindur se krijimi i kadastrës fiskale dhe zbatimi i këtij ligji do të krijojë një bazë të dhënash shumë të mirë dhe kjo do të jetë një ndër reformat kryesore që është ndërmarrë në Shqipëri në fushën e taksimit.”
“Me përfundimin e kadastrës fiskale për ndërtesat, ku çdo ndërtesë do të ketë vlerën e saj reale dhe sipërfaqen, më vonë ne do të kemi mundësi të fillojmë me reformimin e taksës mbi tokën bujqësore, sepse kemi 27 vjet që nuk e administrojmë këtë taksë.
Pra, do të futet edhe toka bujqësore në sistemin e kadastrës, po kështu edhe truajt dhe në përfundim do të kemi një sistem të taksës mbi pronën të saktë dhe bashkëkohor, sepse e kemi theksuar vazhdimisht institucionet ndërkombëtare kanë 10 vjet që na kërkojnë reformimin e taksës së pronës.
Krijimi i kadastrës fiskale me të dhëna të sakta i jep mundësi pushtetit vendor të mirëmenaxhojë këtë taksë në të mirë të komunitetit,” shtoi Lera.
