Ndërkohë që priten vetëm pak minuta nga fillimi i takimit të ish-kryeministrit Berisha në Fier, në vendin ku do të zhvillohet ajo që lideri demokrat e quan “Foltorja” është parë të jetë prezent edhe deputeti i PD-së së këtij qarku, Luan Baçi.
Baçi është edhe kreu i degës së PD-së në Fier duke dhënë kështu një mesazh të fortë ndaj kryedemokratit Lulzim Basha, i cili është këto ditë nën breshërinë e akuzave të Berishës për marrëveshje me Ramën dhe shitje të bazës së demokratëve.
I pyetur nga gazetarët e pranishëm se përse ndodhet në këtë organizim të Berishës kundër Bashës, Baçi u shpreh se PD nuk është as e kreut aktual dhe as e ish-kryeministrit, por e demokratëve. Prandaj, sipas tij, pas këtyre debateve partia pritet të dalë me e fortë.
“Jam pjesëmarrës si të gjithë anëtarët dhe simpatizantët e PD-së së Fierit. Ka një lloj entuziami nga strukturat e PD-së së Fierit për të qënë këtu.
Ka patur një thirrje mes anëtarëve të PD-së për të marrë pjesë në këtë foltore dhe absolutisht unë jam një prej tyre”, tha Baçi duke theksuar se përkrahte vetëm PD-në.
“Nga kjo lëvizje që ndoshta doli spontanisht, PD do të dalë më e fortë”, vijoi ai.
Kjo prezencë e tij në këtë aktivitet, e radhit në krahun e Berishës kundër Bashës. Në këtë llogore gjenden edhe Edi Paloka, Flamur Noka dhe Tritan Shehu, të cilët po ashtu kanë dalë publikisht në mbështetje të Berishës.
