Prokuroria e Krimeve të Rënda po përpiqet t’u japë përgjigje disa pyetjeve të rëndësishme sa i përket procesit ndaj bandës së Habilajve.
Në përgjime ata flasin për “shefin e madh”. Mediat kanë spekuluar se bëhet fjalë për Saimir Tahirin, ish-ministër i Brendshëm. Provat që kërkohen, thotë një burim i besueshëm për lapsi.al, janë mbi një takim që mund të jetë zhvilluar mes ministrit të Brendshëm dhe Florian Habilajt në kulmin e operacionit “Fundi i Marrëzisë”.
Edhe në përgjime Florian e Moisi Habilaj përmendin lojërat e fatit që ishin qëllimi i këtij operacioni.
Prokuroria dyshon se takimi mund të jetë zhvilluar në zyrën e Ministrit, shkruan lapsi.al.
Për këtë arsye ajo ka sekuestruar në fundjavë librin e hyrje-daljeve pranë ministrisë së Brendshme.
Sipas rregullave, çdo person që hyn në këtë dikaster, duhet të lërë në hyrje kartën e identitetit, ndërsa emri i shënohet në regjistër.
Dhe takimi me Florian Habilajn, i njohur si “Lolo” nuk përjashtohet që të ketë ndodhur po në zyrën e Ministrit të Brendshëm.
Ish -kryeministri Sali Berisha, një prej njerëzve me më shumë informacion për zhvillimet në vend, njoftonte pak ditë më parë se takimi ka pasur në fokus pikërisht lojërat e fatit.
“Ky eshte famozi Lolo, qe sipas pergjimit te autoriteteve italiane erdhi me vrap tek i “madhi” ne Tirane gjate operacionit policesk “Fundi i Marrezise” per lojrat e fatit, te ankohej tek Saje qorri kunder Agron Xhafes, pronar tjeter i lojrave te fatit ne Vlore. Saje zgjidhi sherrin! sb”, raportonte “qyetetari dixhital” i tij.
Saimir Tahiri do të thirret sërish në Prokurorinë për Krime të Rënda. Do të japë shpjegime për disa detaje të reja që kanë dalë nga përgjimet e Habilajve, në dosjet e tjera që kanë ardhur nga Italia.