Kryetari i Partisë Demokratike, Lulzim Basha, është takuar sot me përfaqësues të Dhomës së Tregtisë dhe Industrisë për të folur për krizën ekonomike pas pandemisë COVID-19 si dhe alternativat e PD-së për të siguruar rimëkëmbjen e ekonomisë.
Gjatë fjalës së tij, kryedemokrati Basha theksoi se kryeministri Edi Rama ka dështuar në menaxhimin e krizës së pandemisë.
“Me përfaqësinë më të lartë nga Dhoma e Tregtisë dhe Industrisë Tiranë diskutuam për krizën ekonomike pas pandemisë Covid-19 dhe për alternativat tona për rimëkëmbjen e ekonomisë shqiptare.
Ata shprehen shqetësimin e tyre se Paketa 1 dhe 2 të ndërmarra nga qeveria kanë qënë joefektive dhe me një ndikim të papërfillshëm tek biznesi.
Masa e financimit është shumë e ulët ndërsa pengesat burokratike i kanë bërë ato të pazbatueshme.
Si rrjedhojë, sot në kohë emergjence financimi i ekonomisë është inekzistent, ndërsa sektorë si biznesi prodhues, turizmi, bujqësia dhe transporti mbeten ende pa asnjë mbështetje.
Menaxhimi i pandemisë dhe krizës ekonomike është dështimi më i madh i Ramës. Fatkeqësisht, këto dështime po i kushtojnë shumë shtrenjt shqiptarëve dhe ekonomisë së tyre që sot po varfërohen edhe më shumë.
Partia Demokratike propozoi masa konkrete mbështetëse për biznesin vendas dhe për të punësuarit e tij por Rama zgjodhi t’i harxhojë lekët e buxhetit të shtetit për një grusht oligarkësh dhe jo për njerëzit.
Ai është sot e keqja më e madhe për vendin”, tha Basha.
Lideri i opozitës tha se Partia Demokratike ka një plan konkret, i cili sipas tij, ka për qëllim rimëkëmbjen e shëndoshë të ekonomisë shqiptare. Në planet e PD-së shtoi Basha është parashikuar ulja e taksave, frenimi i monopoleve si dhe bllokimi i klientelizmit.
“Unë dhe opozita e kemi një plan konkret për rimëkëmbja ekonomike të vendit dhe rritjen e punësimit të shqiptarëve: ky është prioriteti absolut i programit tonë ku përveç ndihmës financiare për të kapërcyer krizën ne do të ofrojmë edhe instrumentet dhe financimin e duhur për ekonominë prodhuese, uljen e taksave, luftën ndaj monopoleve dhe klientelizmit, si dhe mbështetjen dhe financimin e projekteve madhore ekonomike që do krijojnë punësim dhe mirëqenie për shqiptarët”, u shpreh Basha.
