Sekretari amerikan i Shtetit Marco Rubio deklaroi të dielën se sulmi rus ndaj qytetit Sumy në Ukrainë është një “kujtues tragjik se pse Presidenti Trump dhe administrata e tij po vënë kaq shumë kohë në përpjekjen për t’i dhënë fund kësaj lufte dhe për të arritur paqen e qëndrueshme”.
Ai shton se SHBA shpreh “ngushëllimet më të thella” për viktimat e sulmeve raketore.
Ushtria ruse i hodhi dy raketa balistike në qendër të qytetit rreth orës 10:15 të mëngjesit, në kohën kur njerëzit ishin mbledhur për të festuar të Dielën e Palmave, sipas zyrtarëve.
Sulmi ndodhi më pak se një ditë pasi diplomatët e lartë të Rusisë dhe Ukrainës akuzuan njëri-tjetrin për shkeljen e një marrëveshjeje të përkohshme të ndërmjetësuar nga SHBA për ndaljen e sulmeve ndaj infrastrukturës energjetike, duke theksuar vështirësitë e bisedimeve për t’i dhënë fund luftës trivjeçare.
Muajin e kaluar, Kremlini dhe Shtëpia e Bardhë shpallën pikat e përgjithshme të një armëpushimi – një ndalim i kufizuar i sulmeve ndaj infrastrukturës energjetike si termocentralet, linjat e transmetimit, nënstacionet dhe struktura të ngjashme.
