Kryeministri shqiptar, Edi Rama u bëri thirrje politikanëve në gjermanë të mos pengojnë rrugën për hapjen e negociatave të anëtarësimit të vendit të tij në BE.
“Ekziston një shqetësim i qartë që individë dhe forca politike të Bashkimit Europian kërkojnë të trazojnë gjërat që nuk duhet të trazohen”, deklaroi kryeministri shqiptar për “Süddeutsche Zeitung”.
Kancelaren gjermane, Angela Merkel (CDU), ai e konsideron një mbështetëse të tij. Por, ai e di mirë se ka edhe disa deputetë që duhet të binden në bazë të fakteve dhe rezultateve. Komisioni Europian rekomandoi të martën hapjen e negociatave të anëtarësimit me vendet e Ballkanit, Shqipërinë dhe Maqedoninë. Përfaqësuesja e lartë e Bashkimit Europian, Federica Mogherini deklaroi se rekomandimi për hapjen e negociatave lidhet me reformat e fundit të dy vendeve.
Komisioneri europian për Zgjerimin, Johannes Hahn përmendi zhvillime thelbësore premtuese “Ne nuk po trokasim në portën e Bashkimit Europian, për të hyrë nesër, ne dëshirojmë vetëm të ulemi në tryezën e bisedimeve”, deklaroi Rama. Në të njëjtën kohë ai paralajmëroi për zhgënjim në vendin e tij.
“Rekomandimi i Komisionit nuk është një dhuratë dhe as lëmoshë, por ai është i bazuar në arritjet tona”, deklaroi Rama.
Nëse këto gjëra nuk vlerësohen, populli shqiptar do ta konsideronte të padrejtë këtë vendim. “Nëse perspektiva e BE-së eklipsohet dhe fiton politika dritëshkurtër mbi strategjitë afatgjata njerëzit do kërkojnë të largohen”, paralajmëroi Rama.
