Një studim i publikuar së fundmi në “Journal of Family Psychology” ka nxjerrë në pah një realitet interesant në jetën në çift: gratë përjetojnë nivele më të larta stresi kur bashkëshortët e tyre janë duke pushuar, ndërsa ato vetë vazhdojnë të merren me detyrimet e përditshme.
Në të kundërt, burrat duket se relaksohen më lehtë edhe kur partneret e tyre janë ende aktive.
Hulumtimi, i udhëhequr nga psikologia Darby Saxbe dhe ekipi i saj, analizoi mënyrën se si çiftet ndajnë kohën në shtëpi dhe se si kjo ndikon në stresin dhe shëndetin emocional. Rezultatet treguan se gratë ndihen dukshëm më të qeta dhe më të lehtësuara kur burrat përfshihen aktivisht në punët e shtëpisë dhe në përgjegjësitë e përditshme.
Sipas ekspertëve, ndarja e pabarabartë e detyrave krijon ndjesinë e mbingarkesës dhe padrejtësisë, çka rrit stresin, veçanërisht tek gratë. Ndërkohë, përfshirja aktive e të dy partnerëve jo vetëm që lehtëson barrën praktike, por ndikon drejtpërdrejt edhe në mirëqenien mendore.
Studimi thekson se mënyra se si çiftet e organizojnë jetën e përbashkët ka pasoja afatgjata në shëndetin e tyre. Ndihma reciproke dhe bashkëpunimi nuk janë thjesht çështje praktike, por elementë kyç për uljen e stresit dhe përmirësimin e cilësisë së marrëdhënies.
Mesazhi i studiuesve është i qartë: koha e lirë është më e vlefshme kur shoqërohet me ndarje të drejtë të përgjegjësive. Për çiftet që synojnë një jetë më të qetë dhe më të balancuar, përfshirja e ndërsjellë në përditshmëri mbetet çelësi i mirëqenies së përbashkët.
