Pesë faktorë gjenetikë të lidhur me formën më të rëndë të Covid-19, janë zbuluar në Itali. I publikuar në revistën “iScience”, rezultati hap rrugën për teste të reja gjenetike që mund të parashikojnë nëse sëmundja do të ketë një ecuri serioze.
Pesë faktorët gjenetikë, janë mutacione që ndryshojnë funksionimin e dy gjeneve, të quajtur “TMPRSS2” dhe “MX1” dhe u identifikuan nga kërkimi i kryer nga grupi i “Ceinge-Biotecnologie” të Napolit, të udhëhequr nga Mario Capasso dhe Achille Iolascon, profesorë të Gjenetikës Mjekësore në Universitetin ‘Federico II’ në Napoli. Tani është e mundur të kompletohet pamja e shkaqeve në origjinën e formave të rënda.
Faktorët e rrezikut të njohur deri më tani, domethënë mosha e avancuar, seksi mashkullor dhe sëmundjet shoqëruese, nuk e shpjeguan plotësisht spektrin e gjerë të manifestimeve klinike të sëmundjes të shkaktuar nga virusi SarsCoV2.
Që prej një viti, i njëjti grup kërkimor, kishte hipotezuar rolin e faktorëve gjenetikë në zhvillimin e një forme më agresive të Covid-19.
Konfirmimi tani ka mbërritur, me analizën e të dhënave gjenetike të mbledhura nga mbi 1.7 milionë qytetarë evropianë dhe të arritshëm falë bashkëpunimit ndërkombëtar me konsorciumin ‘Covid-19 Host Genetics Initiative’, i cili përfshin 143 qendra kërkimore në të gjithë botën.
Nga 1.7 milionë të dhëna gjenetike të analizuara në kërkimin italian, një milion kishin të bënin me njerëz të shëndetshëm dhe mbi 7,000 me subjekte pozitive, të shtruar në spital, sepse kishin zhvilluar një formë të rëndë të sëmundjes.
Analiza gjenetike, bëri të mundur identifikimin në kromozomin 21 të karakteristikave të zakonshme për rastet e rënda dhe në këtë mënyrë mund të sjellë identifikimin e pesë mutacioneve të lidhura me formën e rëndë të Covid-19.
“Ky studim, hedh bazat për zhvillimin e testeve të reja gjenetike, që na lejojnë të parashikojmë se cilët subjekte janë në rrezik të lartë të zhvillimit të manifestimeve të rënda klinike të Covid-19”, – vëren Capasso.
Për studiuesin, për më tepër, “një forcë e këtij studimi, qëndron në faktin se ne kemi përdorur teknika llogaritëse të krijuara ‘ad hoc’ për të studiuar një sasi kaq të madhe të të dhënave gjenomike”.
Sipas Iolascon, “dy gjenet (TMPRSS2 dhe MX1) të gjetura më shpesh në mutacionet e grupit të rëndë të pacientëve, mund të jenë objektiva potencialë terapeutikë”.
“Ansa”-“Si”
