Tirana njihet si një nga klubet më të “fiksuara” pas trajnerëve. Këtë e faktojnë pikërisht statistikat. Mjafton të shohësh pankinën bardheblu të 10 viteve të fundit dhe rezulton se në total janë ndërruar jo pak, por 24 “timonierë”. Por duhet saktësuar se vetëm 19 janë emëruar prej drejtuesve më të lartë të klubit, pasi 5 të tjerët kanë qenë me statusin e provizorëve.
Rasti konkret është i Krenar Alimehmetit, Alban Tafajit, Emanuel Egbos dhe Ivan Gvozdenoviçit. Dhe duhet thënë që i pari është trajneri më “jetëshkurtër”, pra Alihmehmeti. Ai ka qëndruar vetëm për 4 ditë në këtë post dhe, më pas, është zëvendësuar prej Astrit Hafizit. Sakaq, ai që ka qëndruar më gjatë në krye të stolit kryeqytetas është Gugash Magani, me plot 18 muaj. Më shumë se 1 vit kanë rezistuar edhe 2 trajnerë të tjerë veç peqinasit, konkretisht Hulian Rubio me 14 muaj dhe Ilir Daja me 1 vit e një ditë.
Kësaj tresheje i afrohet edhe Nevil Dede, i cili qëndroi 1 vit pa një javë. Zëvendësuesi më i suksesshëm është Alban Tafaji, i cili largimin të Agustin Kolës, fitoi edhe titullin kampion. Gjithsesi, më i suksesshëm mbetet Hulian Rubio, i cili fitoi 3 trofe në total, një Kupë Shqipërie dhe dy Superkupa. Të huaj gjatë kësaj kohe kanë ardhur 5, konkretisht Slishkoviç, Lonçareviç, Kërstiçeviç, Rubio dhe Ze Maria.
TITULLI I FUNDIT – Dashur pa dashur, Tirana bën 1 dekadë pa titull. Edhe pse sikur të ngjitet në elitë në fund të këtij kampionati dhe sezonin pasardhës të shpallet kampione e Kategorisë Superiore, kompleton 10- vjeçarin. Sikundër dihet, i fundit titull që bardheblutë kanë fituar, është ai i 2009-ës. Që prej asaj kohe kanë pësuar rënie graduale, duke sjellë edhe “kapitullimin” në Kategorinë e Parë. Në një dekadë kanë siguruar edhe 8 trofe të tjerë veç titullit, 3 Kupa Shqipërie dhe 5 Superkupa.
