Viti 2017 ishte një vit i rëndësishëm për kinematografinë, duke sjellë me vete disa ndryshime pozitive dhe ide të reja në ekranin e madh. Në Shtetet e Bashkuara, 721 filmat më të mëdhenj arritën të shisnin 1.24 miliardë bileta kinemaje duke arkëtuar mbi 11 miliardë dollarë të ardhura.
Për të tretin vit radhazi që prej rifillimit të sagës “Star wars”, tashmë nën pronësinë e Disney, “The Last Jedi” u pozicionua në vendin e parë, duke ia rrëmbyër fronin “E bukura dhe Bisha”.
Filmi i 8-të i sagës arriti të fitonte 517 milionë dollarë në kinematë amerikane dhe mbi 220 milionë dollarë në javën e tij të parë në nivel botëror. Megjithatë, në renditjen globale arriti të zinte vetëm vendin e tretë, për shkak të premierës së vonë në fund të dhjetorit.
Teksa filmi është ende në kinema, 2017-ën për nga fitimet botërore e pushtoi pikërisht “E Bukura dhe Bisha”, me 1.2 miliardë dollarë.
Për vitin që lamë pas, industria e filmave arriti të gjeneronte 39.92 miliardë dollarë të ardhura, çka është 3% më shumë se në vitin 2016 dhe e bën 2017-ën vitin më fitimprurës të të gjitha kohërave.
Nga studiot e mëdha, fituesi i vërtetë i 2017-ës duket se është Buena Vista, ose shtëpia filmike e Disney, me 6 filma ndër 20 të parët, falë edhe filmave me superheronj të Marvel. Nëse llogarisim se tashmë Disney zotëron edhe studiot Fox, atëherë lista zgjerohet me 3 filma të tjerë: “Logan”, “Boss Baby” dhe “Lufta për Planetin e Majmunëve”.
Sa i takon fitimeve vetëm jashtë Shteteve të Bashkuara, atëherë lista kryesohet nga “The Fate of the Furios”, me mbi 1 miliardë dollarë të fituara, falë popullaritetit të filmit në Kinë.
Një risi këtë vit kishte të bënte me filmat me personazhe kryesore femra, të cilat zunë tre vendet e para. Rei, Bella dhe Wonder woman arritën të bënin atë që nuk ndodhte prej të paktën 37 vitesh.
