Një 50-vjeçar nga Shkodra, i dënuar dhe i arrestuar disa here më parë për krime kundër jetës, por edhe për shfrytëzim prostitucioni, është vënë sërish në pranga nga Policia e Tiranës.
I arrestuari është Ilir Peraj, pronar i një lokali me muzikë live në autostradën Tiranë–Durrës. Të paktën gjatë 8 viteve të fundit, ai ka pasur në pronësi lokale të ngjashme dhe është arrestuar 3 herë për krime që kanë ndodhur në bizneset e tij. Një herë për vrasje e dy herë të tjera për shfrytëzimin për prostitucion të balerinave, që i kishte të punësuara. Kështu ka ndodhur edhe në rastin më të fundit.
Policia tha se ka finalizuar operacionin e koduar “Mbishkrimi”, për goditjen e shpërndarjes së drogave të forta me doza të vogla në lokale nate dhe përshtatjen e tyre për prostitucion.
Gjatë këtij operacioni, të kryer nga Seksioni për Hetimin e Narkotikëve i Policisë së Tiranës, u gjet një letër me mbishkrimin: “Nuk pranon ti me pi kafe me 50 euro?”.
Kjo letër, sipas burimeve, ishte për një nga balerinat e lokalit, e cila dyshohet se shfrytëzohej për prostitucion nga pronari. Në një nga ambientet e lokalit, e përshtatur si dhomë, u gjet një vajzë me iniciale R.C., e punësuar si balerinë, që sipas Policisë dyshohet se shfrytëzohej për prostitucion. Vajza aktualisht është shoqëruar dhe strehuar në Qendrën e Pritjes së Viktimave të Trafikut.
Ndërsa pronari i lokalit, 50-vjeçari Ilir Peraj, i cili po hetohej prej disa muajsh, u arrestua në automjetin e tij, që e kishte parkuar pranë lokalit. Burimet thanë se ai ishte në gjumë në momentin që nisi operacioni.
OPERACIONI
“Finalizohet operacioni policor i koduar ‘Mbishkrimi’, për goditjen e shpërndarjes së drogave të forta në doza të vogla në lokale nate dhe përshtatjen e tyre për prostitucion. Operacioni nga Seksioni për Hetimin e Narkotikëve në Policinë e Tiranës në bashkëpunim me Prokurorinë. Sekuestrohen doza kokaine, pjatë porcelani me mbetje kokaine, DVR, letër me mbishkrim dhe aparat celular. Në pranga një shtetas (pronari i lokalit), me precedentë të mëparshëm kriminalë në fushën e krimeve ndaj personit”, tha zyrtarisht dje Policia e Tiranës.
Gjatë këtij operacioni u bë i mundur arrestimi i shtetasit Ilir Peraj, 50 vjeç, lindur në Shkodër dhe banues në Tiranë, i dënuar më parë për veprën penale “Vrasja me dashje”, kryer në bashkëpunim. “Për këtë shtetas disponohej informacion se në Rrugën Industriale, në autostradën Tiranë-Durrës, përshtaste lokalin e tij për përdorim e shpërndarje lënde narkotike kokainë dhe për prostitucion”, tha Policia.
Nga kontrolli i kryer është konstatuar se 50-vjeçari ishte duke fjetur në automjetin e tij në afërsi të lokalit. Gjithashtu, gjatë kontrollit në lokalin në administrim të tij iu gjetën dhe sekuestruan në cilësinë e provës materiale doza me lëndë të dyshuar kokainë, një pjatë porcelani me mbetje të lëndës narkotike, një DVR, një letër me mbishkrim dhe një aparat celular.
“Në lokal është gjendur edhe shtetasja R.C., e punësuar si balerinë në këtë ambient, e cila u akomodua në një qendër pritëse për viktimat e trafikimit. Materialet procedurale do t’i kalojnë Prokurorisë pranë Gjykatës së Shkallës së Parë Tiranë, për veprime të mëtejshme hetimore, për veprat penale ‘Prodhimi dhe shitja e lëndëve narkotike’, ‘Përshtatja e lokalit për përdorim droge’ dhe ‘Shfrytëzim prostitucioni’ në ngarkim të shtetasit I.P.”, tha zyrtarisht Policia.
